Җәяүлегә җил дә каршы, караңгы төн дә куркыныч

Кабатларга ярамаган мисаллар

Аллаһы Тәгалә кешегә акыл биргән. Адәм баласы тау башыннан упкынга сикерүнең яки дөрләп янган утка керүнең үлем икәнлеген белә һәм аңлый, әлбәттә. Ләкин, безнең халыкның ми күзәнәкләренә юл хәрәкәте кагыйдәләрен үтәмәүнең шундый ук фаҗига белән тәмамланачагы һаман барып җитми.

— Республикада быелның 9 аендагы 2586 юл-транспорт авариясендә 217 кешенең гомере өзелде, 3203 кеше төрле авырлыкта имгәнүләр алды,- диде матбугат конференциясендә Татарстан буенча Эчке эшләр министрлыгының ЮХИДИ идарәсе җитәкчесе Ленар Габдрахманов.

Үлүчеләр һәм имгәнүчеләр саны узган елның шул чоры белән чагыштырганда, шактый кимегән. Спиртлы эчемлек кулланган хәлдәгеләр һәм дә транспорт чарасын идарә итүдә 2 елдан азрак стажы булганнар катнашындагы аварияләр саны шулай ук кимегән.

Аракы бәһасе- 2 яшьлек бала

Спиртлы эчемлек кулланып, транспорт чарасын идарә итү җинаятькә тиң, ди Ленар Габдрахманов. Әлмәт районында быелның 29 июнендә булган фаҗигане мисал итеп китерде ул. Исерек хәлдәге ир 2 яшьлек баласын утыртып, җиңел автомобильдә юлга кузгалган. Тик, сәфәрләре авария белән тәмамланган, бала имгәнүләр алудан үлгән.

— Автомобильдә балалар булган вакытта да тизлекне арттыру, каршы як полосага чыгып узып китү очраклары бар. Балалар белән барганда тизлекне нык киметергә, кагыйдәләрне катгый үтәргә кирәк, ләбаса,- ди республиканың баш автоинспекторы.

Быелның 9 аенда балалар катнашындагы 344 авариядә 11 бала үлгән, 370е имгәнгән.

— Ике авариянең берсендә балалар-пассажир сыйфатында барган вакыт. Алты очракта руль артындагы кешенең исерек булганлыгы ачыкланды, ә җиңел машинасы эчендә балалар да утыртылган. Моның кадәр дә акылсызлык күрсәтергә ярамый. Кечкенә сабыйларны автомобильдә махсус урындыкта йөртү кирәк. Шушы таләпне үтәмәүнең 12 мең очрагы теркәлде,- диде Ленар Габдрахманов.

Җәяүлегә җил дә каршы, караңгы төн дә куркыныч

Татарстанда җәяүлеләр катнашында 329 авария чыгарга өлгергән инде. Транспорт чараларын идарә итүчеләр юл кичүләрендә 13 кешене бәрдереп үтергән. Җәяүлеләрне уздырып җибәрмәгәне өчен 26 мең автомобильче штрафка тартылган.

— Чаллы шәһәрендә М-7 автотрассасы участогы җәяүлеләр өчен хәвефле иде. Анда узган ел 3 җәяүле бәрдерелде. Шушы участокта җәяүлеләр өчен җир өсте юл кичүе төзелде. Казандагы Даурия урамында да узган ел 3 җәяүле бәрдерелде, биредә җәяүлеләр юл кичүе янына “лежачий полицейский” ясалма тигезсезлек түшәлде. Светофорсыз 25 җәяүлеләр кичүендә өстәмә яктырту, ясалма тигезсезлекләр урнаштыру чаралары күрелде. Җәяүлеләр үзләре дә юлларда кагыйдәләрне үтәсеннәр иде,- диде ЮХИДИ идарәсе башлыгы.

Төнге сәгатьләрдә җәяүлеләр катнашында 233 авария булган, аларда 37 җәяүле үлгән.

— Караңгыда киемнәргә яктылык кайтара торган элементлар беркетү кирәк. Торак пунктлардан читтәге юлларда барганда мондый элементлар булмаса, җәяүлегә штраф салына. Яктылык кайтара торган тасмалар, бизәкләр иминлекне саклый, бу мәсьәләгә җаваплы карасак иде,- дип үтенде Ленар Габдрахманов.

Җәйге тәгәрмәч- Әҗәл “куласасы”

Узган елның ноябрендә кар явып киткәннең беренче өч көнендә 580 авария теркәлгән, 9 кеше үлгән, 40 кеше имгәнгән.

— Һава температурасы 0 градустан түбән төшкәндә җәйге резинаның юл өслеге белән ялганышы кими, шунлыктан, кышкы резиналарга күчү зарур. Техник регламент буенча да кышкы чорда җәйге резиналы тәгәрмәчләрдә йөрү тыела. Юлларда сак булыйк, башкаларның фаҗигасеннән сабак алыйк,-дип тәмамлады сүзен ЮХИДИ идарәсе җитәкчесе Ленар Габдрахманов.