Ике тапкыр “үлеп терелгән” 6 яшьлек балага ярдәм кирәк

Тормышка гашыйк җан
Балтачта яшәүче Раил һәм Рәзилә Мәхмүтовлар гаиләсенә килгән сынауларны беркем дә күрмәсен иде, дип телим. Ике гаҗәеп кызның әнисе – Рәзилә белән аралашкач, үзем дә ике бала әнисе буларак, аның хис-кичерешләрен, борчу-сагышларын күңелем аша уздырдым.

...Матур гаиләнең бәхетен тагын да тулыландырып, 2014 елның августында нәни кыз бала дөньяга аваз сала. Бәлки бу очракта “аваз сала” дип әйтү дөрес тә түгелдер, сабый йөрәге туктап туа. Тормышны ярату беренче мизгелдән үк бирелә аңа. Йөрәге тибә башлый һәм ул башка яшьтәшләре кебек үк үсә. Имә, “ыгы-ыгы” дип нидер сөйли, уенчыклар тотып, әти-әнисен, якыннарын матур елмаюы белән сөендерә. Ренатага 7 ай ярым булгач, планлы рәвештә аңа беренче прививка ясала. Бала икенче көнне үк бөтенләй башка төрлегә әйләнә. Утыртып куясың, утыра алмый, елмаймый, уенчыклар да кызыксындырмый башлый. Әти-әнисе нишләргә белми, бик күп табибларга мөрәҗәгать итә. Күп санлы түләүле дәвалану курслары үтә. Сабый акрынлап элекке халәтенә кайта башлый. Тотынып йөрергә өйрәнә, акрынлап теле ачыла.

Икенче үлемнән калган бала
– Бүгенгедәй хәтеремдә: 2016 елның 1 гыйнварында үзе тәпи китте кызыбыз, йөгереп йөри башлады, – дип искә ала ул көннәрне әнисе Рәзилә ханым. – 4 гыйнвар көнне эчәклекләренә инфекция эләгеп, хәле бик авырайды. Секунд эчендә балабыз күзгә күренеп сулды. Температурасы 41гә кадәр күтәрелде, зәңгәрләнде. Аның бит ашыгыч ярдәм машинасы да тиз генә килми, озак көттек. Машинада кызыбызның йөрәге тагын туктады.
Рәзилә – бик көчле әни. Шушы җан әрнеткеч вакытларны искә алганда, ничек кенә авыр булса да сиздермәде. Кызчыкны аңына китерәләр, ләкин анда бик көчле көзән җыерулар башлана. Бик авыр хәлдә Казанга реанимациягә эләгә. Шул вакытта аңа башка исем – Рания, дип кушалар. Исемен алыштыруга, сабый күзләрен ача. Ләкин әти-әнисен дә, башкаларны да танымый, хәтта күрми башлый. 41 температура бер ай буе бернинди даруга да, уколга да бирешми. Көзән җыеруларны туктату өчен, Ранияне ясалма комага җибәрәләр.

Сеңлесе булу – зур этәргеч
Аның яшәү теләге шулкадәр көчле була, сәламәтлегендә алга китеш сизелә. Һәм аларны Казандагы яңа ачылган реабилитация үзәгенә күчерәләр.
– Табибларның, үзебездә дәваланыгыз, беркая да барырга кирәкми, дигән сүзенә карап, күп вакытны әрәм иттек. Чит илдә дәваланырга кирәк, дигән сүз җитә калды. Бөтен мөмкинлекләрне дә кулланырга тырыштык. Мәскәү, Санкт-Петербург, Йошкар-Ола, Пензада, чит илләрдә – Польшада, Бельгиядә дәвалану курслары уздык. Рания хәзер үрмәләп йөри башлады. Аз-маз сүзләр әйтә, төсләрне, формаларны, саннарны белә. Хәзерге көндә без Йошкар-Олада, акрынлап хәрефләр өйрәтә башладылар, – дип бүгенге яңалыклары белән уртаклашты Раниянең әнисе.

Ул бөтен әйберне күзе белән күрсәтә, аңа төбәп әйтелгән һәр сүзне аңлый, кирәген үзе дә аңлата белә икән. Иң мөһиме – баш миенең аң ягына зыян килмәгән. Әнисе сүзләренчә, Бельгиядәге курслар бик ярдәм иткән. Хәтта 1 сентябрьдән балалар бакчасына да йөри башлаган. Күп вакыт дәвалануга китсә дә, дуслары, яшьтәшләре белән аралашу, бергә уйнау да нык ярдәм итә Раниягә. Сеңлесе булу да – зур этәргеч. Өйдәге рәхәт мохитне бер генә чит ил дә алыштыра алмый, шуңа күрә өйдә дә ныклап шөгыльләнү өчен, күп кенә тренажерлар алган аңа әти-әнисе.

Чит илдә – арзанрак
Сәламәтлек миллионнар белән бәяләнгән заманда, Мәхмүтовлар гаиләсе дә кызларын дәвалау өчен 3 миллион сумнан артык акча тоткан. Аннан бигрәк, документ җыюга гына да күпме көч һәм вакыт кирәклеген мондый хәлне үз башы аша үткәннәр генә аңлыйдыр. Хәзер алар Польшага барырга әзерләнә. Анда дәвалану безнең илдәгедән арзанрак, ләкин күпкә файдалырак һәм курслар саны да күбрәк икән. Шуңа күрә акчалата ярдәм күрсәткән һәр кешегә рәхмәтле булачаклар. Раниянең сәламәт булуы өчен, һәммәбез өлеш кертә ала.
Хәзер аларга 541 324 сум акча кирәк.
128 216,83 сум гына җыелган.

Ярдәм күрсәтү өчен реквизитлар:
✅Сбербанк картасы
5336 6902 1467 5433
✅Телефон номеры 89179321120 беркетелгән (Махмутова Разиля Рашитовна, Раниянең әнисе)
✅Счёт 40817810962003162043

Динара Әхмәт