Норлат клубының «йөзем»е

Бу юлы да Норлат клубында Җиңү бәйрәменә багышланган концерт программасын Лилиясез башламадылар. Ә ул Яшел Үзән шәһәрендә үткәрелгән III «Яңа көн» патриотик җырлар фестивалендә катнашып, җиңү белән кайтты. Муса Җәлилнең «Вәхшәт» шигырен укып, жюрины таң калдырган. Лилиягә дә, әнисеннән калышмаган улы Рамазанга да шәһәр бәйгесендә җиңүләре өчен клуб мөдире Шәүкәт Миңнуллин рәхмәт сүзләре җиткерде, дипломнар тапшырды.
Лилия Сибгатуллина Яшел Үзән районының Бакырчы авылында туып үскән. Әти-әнисеннән җырларга, биергә өйрәнгән кыз кечкенәдән артист булам дип хыялланган. Шуңа да урта мәктәпне тәмамлагач, документларын җыеп, ул якташы - драматург Юныс Сафиуллин янына юл тоткан. Әмма тәҗрибәле якташы яшь кызның хыялларын чәлпәрәмә китергән. «Тормышыңны театр белән бәйләрсең дә, барысы да син уйлаганча килеп чыкмаса, нишләрсең, бәлки, башка һөнәр сайларсың», - дип, кызны күндергән. «Хәзер дә Юныс абыйга карата үпкәм бар әле минем», - ди Лилия. Әмма сәнгатькә булган мәхәббәтне шулай гына сүндереп булса икән ул?! Лилия пешекче һөнәрен үзләштергәндә дә Яшел Үзәндәге «Родина» мәдәният йортында актив катнашып йөргән. Әтиләре яшьли үлеп китеп, әнисе янына авылга кайтып сыер савучы булып эшләргә мәҗбүр булганда да җырлавын ташламаган.
Соңрак, Норлат авылы клубына хезмәткәр кирәк икәнен ишетеп, шунда юл тоткан. Лилия ике ел инде сәхнәдә. Бию түгәрәген дә алып бара. Шушы вакыт эчендә ул Норлат клубының «йөзем»енә әйләнде. «35 яшемдә 120 килограмм авырлыкта булсам да, сәхнәдә бик җиңел бит мин, оялмыйм, чын күңелдән, иркен уйныйм, шуңа да халык якын итәдер инде мине, концерттан соң, гел изге теләкләрен җиткерәләр. Коллективыбыз да бик тату, бердәм эшләгәндә җайлы, рәхәт. Яңа мәдәният йорты да булса, тагын да дәртләнеп эшләр идек», - ди Лилия. Ә Норлат клубының тик торганы юк. Әле менә күптән түгел генә биш авылда концертлар белән булып кайтканнар. Гореф-гадәтләрне искә алып, 23 авылда «аулак өй» кичәләре оештырылган.
«Тормышымда авыр чакларым күп булды, аларны искә дә аласым килми, әбием өйрәткән догалар көч биргәндер миңа, ләкин мин Ходаема икенче ирем - Айратым белән очраштырган өчен бик рәхмәтле, өйләнмәгән яшь егет минем алыштыргысыз терәгемә, улым өчен үрнәк әтигә әйләнде. Хәзер дә төп энергия чыганагым ул минем, илһамландырып тора. Каенана, каенатама да бик рәхмәтлебез. Алар ярдәме белән шундый зур йорт салынды», - ди Лилия. Клуб хезмәткәренең эше тынгысыз, кичләрен дә соңарып кайтырга туры килә, ә Лилия барысына да өлгерә, бакчадагы парнигында инде май башында кыярлар өлгереп утыра, мунча сала башлаганнар. Лилия шигырьләр язарга, гөлләр үстерергә дә вакыт таба. 3 яшьлек уллары Нурисламны да тәрбияли. Киләсе елга театр училищесына барырга теләгән улы Рамазанга да киңәшләрен бирә. «Минем хыялларымны улым чынга ашырсын», - ди ана. Сибгатуллиннарның өй алдында пар аккошлар, бу гаилә дә шул кошлардай тигезлектә яшәсен, бәхетләре гомерле булсын.