“Татмедиа” акционерлык җәмгыятендә матбугат вәкилләре һәм язучылар өчен ифтар мәҗелесе булды.
Анда “Яңа Гасыр” телерадиокомпаниясендә, “Татарстан” радиосында, шәхси басмаларда эшләүче журналистлар катнашты.
Бу ифтар инде бишенче тапкыр оештырыла. Ул 5 ел элек “Безнең мирас” журналының баш редакторы, язучы Ләбиб Лерон башлангычында уздырылган иде.
– Монысына 105 кеше чакырылды. Төп оештыручыларның берсе – мин. Быел безне “Татмедиа” акционерлык җәмгыяте генераль директоры Шамил Садыйков белән “Татмедиа” республика матбугат һәм массакүләм коммуникацияләр агентлыгы җитәкчесе Айдар Сәлимгәрәев хуплады. Башлангычка теләктәшлек күрсәткәннәре өчен зур рәхмәт! - диде Ләбиб Лерон.
Татарстан Диния нәзарәтенең баш казые Җәлил хәзрәт Фазлыев вәгазь сөйләде, инде бакый дөньяга күчкән журналистлар-язучылар рухына дога кылынды.
– “Татмедиа”да бик күп хезмәттәшләребез ураза тота. Төрле матбугат чараларында эшләүчеләрне, ветераннарыбызны чакырып, алар белән күңелле генә аралашу ниятендә оештырдык ифтарны. Аллаһы Тәгалә кабул итсен! - диде Шамил Садыйков.
Татарстан Язучылар берлеге рәисе Ркаил Зәйдулла, Дәүләт Советы депутаты Камил Нугаев та ифтар кунаклары иде. Ләбиб Лерон әйткәнчә, “матбугат ифтары” дәвамлы һәм сәваплы булсын!
Комментарийлар