Авылда яшәп бала тапсаң акча бирәләр

Татарстанда 57959  күп балалы гаилә яши. Бу хакта “Татар информ” агентлыгында узган матбугат очрашуында республиканың хезмәт, мәшгульлек һәм социаль яклау министры Эльмира Зарипова белдерде. 

– Гаилә – җәмгыятьнең нигезе, – диде Эльмира Зарипова. – Шуңа күрә гаиләләргә төрле ярдәмнәр күрсәтергә тырышабыз. Россия Хөкүмәте Татарстанда булган өстенлекләрне башка төбәкләргә уңай яктан күрсәтә. Без авыл җирендә яшәүче яшь гаиләләргә игътибар бирергә һәм аларга кызыксындыру шартлары булдырабыз. Авылда калып, беренче баласын 25 яшькә кадәр тапкан әниләргә бер тапкыр 50 мең сум күләмендә дәүләттән ярдәм алу мөмкинлеге бар. Әгәр дә өченче баласын 29 яшькә кадәр таба икән, бу вакытта бер тапкыр 100 мең сум акча бирелә. 

Авылда гомер итүче 14 меңләп хатын-кыз әлеге ярдәмне алган. Быел исә гыйнвар аеннан алып бүгенгәчә 250 гаилә әлеге өстенлектән файдаланган. “Безнең максат яшьләрне вакытында бала табуга җәлеп итү, - ди Эльмира Зарипова. – Статистика буенча, беренче балаларын 25-28 яшьтә табучы ханымнар шактый. Тик ир-егетләр иртә өйләнергә атлыгып тормый. Беренче тапкыр әти булучылар күбесенчә 30-34 яшьләрдә күзәтелә. Кеше никадәр иртә әти-әни була, шулай яхшырак. Ләкин дөрес аңларга кирәк, без балигълык эшенә кергәннән соң әти-әни булу ягында.  

Инвадлид баласы булган гаиләләргә дә дәүләттән ярдәм каралган. Республикада  фенилкетонурия чире белән авыручы инвалид балаларга быелдан ай саен яшәү минимумының яртысы күләмендә ярдәм бирелә. Бүгенге көндә бу сумма 7300 сум тирәсе. Төбәк бюджеты аша башкарыла торган мондый ярдәмнәр шактый. Мисалга, әгәр дә гаиләдә 18 яшькәчә булган инвалид бала бар икән, андыйлар айлык өстәмә керемгә өметләнә ала. 

Аз керемле гаиләләрдә сабый туган очракта, бала өчен кирәкле әйберләрдән торган комплект бүләк ителә. Яшь гаиләләрнең, аеруча студент гаиләләрендә керемнәр аз. Яшәү минимумыннан ким ( 15073 сумнан) керемнәре булучыларга балалары 3 яшькә җиткәнче медикаментлар өчен елга 10 мең күләмендә ярдәм каралган.  

- Татарстанлылар балалар бакчасына түләү өчен дә ташламалардан файдалана ала, - ди Эльмира Зарипова. – Гаилә керемен исәпкә алмыйча, бер бала йөргән очракта түләүләрнең – 20 проценты, ике бала йөрсә  – 50, өч балага 70 процент акча кире кайта.