Азык-төлек арзан була шимбәләрдә

Татарстан Хөкүмәте карары нигезендә оештырыла торган авыл хуҗалыгы ярминкәләрен шәһәр халкы көтеп ала. Чөнки, бәяләр сәүдә челтәрләрендәгедән шактый арзан, продукция дә үзебезнең җитештерүчеләрнеке.

Казанда язгы авыл хуҗалыгы ярминкәләре14 марттан 26 апрельгә кадәр эшләячәк. Мәскәү базары янәшәсендә дә ярминкә була быел. Биредә базар корылмаларына үзгәртеп төзү эшләре башкарылганлыктан, ярминкәләр үткәрү туктатып торылган иде. Азык-төлек һәм хуҗалык кирәк-яраклары сәүдәсе атна саен шимбә көннәрендә 14 мәйданда оештырыла. Северный бистәсе халкы соравын исәпкә алып, биредәге Беломор урамы белән Гудованцев урамы кисешкән урындагы ярминкә якшәмбе көнне уза.

Ярминкәгә үзләре җитештергән продукцияне республиканың муниципаль районнары, шулай ук Татарстан кулланучылар җәмгыяте, “Майский” теплица комбинаты, “Ак Барс” холдинг компаниясе, кошчылык фабрикалары һәм башка агропредприятиеләре алып килә.

Казанда 2025 елның көзендә 646,8 миллион сумлык продукция сатылган. Шәһәр халкы 264,4 тонна ит, 441,7 тонна бәрәңге, 1086,8 тонна сөт продуктлары сатып алган. Башкаладагы ярминкәләр гадәттәге урыннарында барачак. “Эшлекле дүшәмбе” киңәшмәсендә Вахитов һәм Идел буе районнары хакимияте башлыгы Альберт Салихов хәбәр иткәнчә, тиздән Чехов базарына да үзгәртеп төзү эшләре башланачак. Эшне 2028 елның ахырларына тәмамлау планлаштырылган.

Ярминкәләр эшенә карата сорауларны Казан шәһәре Башкарма комитетының кулланучылар базары комитетына бирергә мөмкин. Телефон: 8 (843) 223-27-72, өстәмә 84331.

Билгеле булганча, Татарстанда «Азык-төлек иминлеген технологик тәэмин итү» илкүләм проекты гамәлгә ашырыла.