Балалар күренсә, тизлекне киметү хәерле

Күңелсез саннар

Дәүләт автоинспекциясе белән «Юл хәрәкәте иминлеге» дәүләт бюджет учреждениесе тарафыннан оештырылды әлеге чара. Яңа уку елы башында балигъ булмаган балалар катнашында юл-транспорт һәлакәтләре артып китүчән.

Ел барышындагы күрсәткечләр дә борчу тудыра: республикада быелның 7 аенда балалар катнашындагы 273 юл-транспорт авариясендә 300 бала төрле авырлыктагы имгәнүләргә дучар булды, ә 11 баланың гомере өзелде. Казанда балалар катнашында 86 авария теркәлде, 87 бала төрле авырлыктагы имгәнүләр алды, шөкер, үлүчеләр юк.

Кагыйдәне онытма

Инспекторлар акция көннәрендә автомобильләрдә яшь пассажирларны йөртү таләпләренең үтәлешенә аерым игътибар бирде. Чөнки, кечкенә балаларны автомобильдә махсус урындыкка утыртып йөртмәү, иминлек каешларын каптырмау сәбәбендә, фаҗигале очраклар шактый еш күзәтелә. 

Казан шәһәре буенча эчке эшләр идарәсенең ДАИ бүлегенең пропаганда хезмәте хәбәрләренә караганда, мәктәпләр янында рейдлар булган, ата-аналар һәм укучылар белән юл хәрәкәте кагыйдәләре темасына әңгәмәләр корылган. Инспекторлар искәрткәнчә, балалар җәйге каникул чорында юлларда хәрәкәт итү тәртипләрен, саклык зарурлыгын онытыбрак җибәрә. Ата-аналарның һәм өлкәннәрнең балаларга юл хәрәкәте кагыйдәләрен кат-кат аңлатулары зыян түгел.

Ялтырап тор юлларда

Көн яктылыгы кимегән көзге һәм кышкы айларда балалар фән түгәрәкләреннән яки спорт секцияләреннән инде караңгы төшкәч кенә кайта. Авыл урамнары аеруча хәвефле, чөнки авылларның күбесендә тротуарлар юк. Балалар юл читеннән атлый, кара киемнәрдә күзгә күренмиләр диярлек.

Шуның өчен киемнәргә, сумка-биштәрләргә яктылык кайтара торган элементлар һәм тасмалар беркетү файдалы. Киемнәренә яктылык кайтара торган элементлар, тасмалар беркеткән бала (җәяүле) автомобильнең якын утында 150-200 метрдан ук күренә. Торак пунктларыннан читтәге юлда барган кешенең киемнәрендә яктылык кайтара торган элементларның булуы мәҗбүри, әлеге таләп үтәлмәсә — штраф.

Ач күзеңне, мәктәп бу

• Казан шәһәре буенча эчке эшләр идарәсенең ДАИ бүлеге пропаганда хезмәте хезмәткәрләре әйтүенчә, кечкенә балалар юлга яки туктап торган транспорт чарасы артыннан кинәт килеп чыга, велосипедларда яки самокатларда юл кичүләрен җәяү чыгу кирәклеген үтәп бетерми. Шунлыктан, мәктәпләр янында һәм юл буйларында балалар күренгәндә транспорт чарасының тизлеген нык киметү сорала.