Данис Шакиров: «Без аларны милләт аналары буларак күрәбез»

Ә иртәгә инде юлга чыгалар. Быел бәйге финалы 7-8 октябрьдә Төрекмәнстанда, «Аваза» дигән милли туристик зонада уздырылачак. 

«Һәр кыз — зур җиңү яулаган милләт баласы»

«Татар кызы» халыкара бәйгесенең финалына Россия төбәкләреннән, шул исәптән Төркмәнстан, Төркия, Үзбәкстан, Кыргызстан 12 кыз чыкты. Кызлар аш-су, нәфис сүз, җыр һәм бию буенча остаханәләр узды. 

— Ел дәвамында бу проект буенча эшчәнлек алып бару өчен аерым дирекция төзедек. Финалга чыккан һәр кыз — зур җиңү яулаган милләт баласы. Киләчәктә без аларны милләт аналары буларак күрәбез. Бүген татар кызы — 19-20 гасыр башындагы мәгърифәтче хатын-кызларының дәвамчылары, — дип ассызыклады Бөтендөнья татар конгрессының башкарма комитеты рәисе Данис Шакиров. 

«Хатын-кызга ир-атка нигезле рәвештә таянырга зарур»

Проектның асылы — татар кызларының күркәм сыйфатларын һәм осталыгын күрсәтү, татар халкының гореф-гадәтләрен, телен, мәдәниятен саклау һәм үстерү. «Ак калфак» татар хатын-кызлары иҗтимагый оешмасы рәисе Кадрия Идрисова да финалистларга милләт язмышында ана ролен искәртте. 

— Һәрберебез милләт анасы булырга әзерләнәбез икән, бу бурыч бәйге беткәннән соң төшеп калырга тиеш түгел. Без барлык татар кызларына, балаларына үрнәк булырга тиеш. Бер генә гади мисал китерәм. Элек-электән хатын-кызларны кияүгә чыга дип түгел, ә тормышка чыга дип әйткәннәр.

Безнең төп бурычыбыз да шул. Юкка гына Аллаһ Тәгалә безгә ана сөтен бирмәгән. Малай үстергән ананың күкрәк сөте тагын да яхшырак. Кыз имезгән ана сөте белән малай имезгән ана сөте аерыла. Моны галимнәр дәлилләгәннәр. Димәк, ата — гаиләдә барыбер өстенрәк булырга тиеш. Ә хатын-кызга ир-атка нигезле рәвештә таянырга зарур, — ди «Ак калфак» татар хатын-кызлары иҗтимагый оешмасы рәисе Кадрия Идрисова. 

Милләтара дуслык һәм хөрмәт

Бәйгенең финалы Төркмәнстанда узу да очраклы түгел. Бу — узган ел бәйгедә җиңү яулаган Алсу Рәфыйкованың туган ягы. «Татар кызы» халыкара бәйгесе дирекциясе рәисе Алмаз Хәлиуллин сүзләренчә, бәйге Төркмәнстан белән Татарстан арасында булган милләтара дуслык һәм хөрмәт күперен ныгыта, ике илнең хезмәттәшлеген яңа дәрәҗәгә күтәрә. 

— «Татар кызы» бәйгесе — язмышымның иң зур бүләге. Яңа дуслар таптым, үзем дә бәйгенең зур гаиләсенә кушылдым. Бу бәйгедә катнашу гына да үзеңне бөек, горур милләтнең бер өлеше итеп хис итәргә ярдәм итә. Үземнең туган якка җиңүче булып кайту — минем өчен зур дәрәҗә. Минемчә, барысы да яхшы булачак. Әзерлек бик көчле, — диде Алсу Рәфыйкова.

Бәйгедә катнашучы Удмуртиядән Айсылу Ишалина да быел финалистлар рәтендә. 

— Финалистлар рәтенә керермен дип уйламаган идем. Оештыручыларга бик зур рәхмәт. Милләт анасы — халыкка хезмәт итәргә тиеш. Киләчәктә милли җанлы балалар үстереп, матур гаилә корасы килә. Хыялларда мин һәрвакыт чәчәкле бакчаны күрәм. Балаларым, тормыш иптәшем, әти-әниләремне күз алдына китерәм. Гореф-гадәтләр канга сеңсә дә, көн саен милләтем турында яңалык ачам. Димәк, киләчәгем өчен, хыялларым өчен нигез салам. Бу бәйгедә иң зур җиңү — шушыдыр, — ди Айсылу.

Искәртеп үтәбез, бәйге финалы 7-8 октябрьдә Төрекмәнстанда, «Аваза» дигән милли туристик зонада уздырылачак.