“Ел хатын-кызы” һәм “Ел ир-аты” исеменә лаеклылар ачыкланды

Ир-атлар арасында да көчле рухлы, батыр йөрәклеләр санаусыз... Менә инде 30 ел дәвамында шулар арасыннан иң-иңнәрен “Ел хатын-кызы. Ел ир-аты: хатын-кыз карашы” бәйгесе кысаларында билгеләп үтәләр. Традиция буенча конкурска нәтиҗәләр Халыкара хатын-кыз көне алдыннан ясала.  Һәр елны яңа исемнәр, яңа язмышлар ачыла…

Сугыш ачысын татыган 93 яшьлек Ленинград блокадачысы, махсус хәрби операция башланганнан бирле пенсиясенең бер өлешен батыр ир-егетләребезгә ярдәм итүгә юнәлткән түбәнкамалы Рокыя Сәхәбетдинова.... Азнакайның Бүләк авылында гомер итеп, 14 бала тәрбияләп үстергән – өч үз баласы янына авариядә һәлак булган иптәш кызының 5 баласын сыендырган, тагын алтыны балалар йортыннан алган олы йөрәкле Фирдания Мөҗипова... Балтач районында махсус хәрби операциядәгеләргә ярдәм итү буенча волонтерлар командасын җыеп, 100ләп кешене үз тирәсендә берләштергән пешекче Алсу Шәфигуллина... Зәй районы Аксар авылында 28 ел буе хат ташучы булып хезмәт куйган, буш вакытында бәйрәмнәр алып баручы, җырга-моңга, аш-суга, кул эшләренә осталыгы белән дан тотучы Флүрә Гыйниятова...  “Корстон” сәүдә-күңел ачу комплексында җыелган  “Ел хатын-кызы. Ел ир-аты: хатын-кыз карашы” бәйгесенең быелгы җиңүчеләре арасында кемнәр генә юк. Аларның яше дә, яшәү урыннары да, башкарган хезмәт-вазыйфалары да төрле. Әмма барысына да сокланып карыйсың – бу кадәр булдыклы, зирәк, тәвәккәл булырга кирәк бит, әй!

- Хатын-кыз – тормыш иптәше, хатын-кыз — әни, хатын-кыз – дәү әни. Гаиләдә төп рольне, әлбәттә, хатын-кыз үти. Татар гаиләләрендә һәрхәлдә шулай. Русларда да шулай дип уйлыйм. Чөнки ир, балалар, оныклар, бөтен гаилә турында кайгырту хатын-кыз җилкәсенә төшә. Сез тормышыбызга матурлык, мәхәббәт һәм бәхет алып киләсез. Тормышта очраган авырлыкларга карамастан, һәрчак нәфис булып каласыз, оптимизм саклыйсыз. Сезнең эшлекле сыйфатларыгыз гармонияле рәвештә зирәклелек һәм сабырлык, игелеклелек һәм тормыш яратучанлык белән үрелеп бара,  - дип билгеләп үтте Татарстан Дәүләт Советы рәисе Фәрит Мөхәммәтшин.

Конкурс өч этапта 10 номинация буенча уздырылды. 2024 ел нәтиҗәләре буенча, конкурска республиканың 44 муниципаль берәмлегеннән барлыгы 320дән артык гариза килгән, зона турларына 269 катнашучы тәкъдим ителгән, республика этабына 43 муниципаль берәмлектән 155 катнашучы узган. Финалга үткән иң-иңнәре исә «Хатын-кыз – ана», «Хатын-кыз – мәдәният һәм рухият», «Хатын-кыз – галим», «Минем язмышым – минем һөнәрем» , «Хатын-кыз – лидер», «Хатын-кыз – бизнес-леди», «Өлкән буын героинясы», «Хатын-кыз – ел үрнәге» номинацияләрендә җиңүчеләр булды. Моннан тыш, гүзәл затлар карашы буенча иң лаеклы ир-атлар «Игелекле йөрәкле ир-ат» һәм «Ир-ат – лидер» номинацияләрендә билгеләп үтелде.