Электр транспортында кондукторлар бетерелде, хезмәт хакы артты

Электр транспорты Казанның транспорт челтәрендә 36,4 процентны тәшкил итә. Узган ел “Зооботаника бакчасы” һәм “Юстиция кварталы” аша яңа 11нче троллейбус маршруты җибәрелде.

– Җир өсте электр транспортында 42 миллионга якын пассажир йөртелде. Россиядә беренче булып кондукторсыз эшләүгә күчтек, әмма пассажирлар агымы саклап калынды. Кондукторсыз эшләүгә күчү предприятие штаты санын киметү һәм елына 371 миллион сум хезмәт хакы фондын экономияләү мөмкинлеге бирде. Әлеге акчалар хезмәт хакларын арттыруга, ремонт эшләре башкаруга юнәлтелде, – диде “Метроэлектротранс” муниципаль унитар предприятиесе генераль директоры Айдар Абдулхаков “эшлекле дүшәмбе” киңәшмәсендә.

Предприятиедә узган ел уртача хезмәт хакы 89,9 мең сумга җиткән. Хезмәт шартларын яхшырту нәтиҗәсендә трамвай һәм троллейбус йөртүчеләр саны 10 процентка, электр поездлары машинистлары саны 21 процентка арткан. Сәлимҗанов һәм Короленко урамнарындагы төзекләндерелгән тулай торакларында 600 кеше яши.

Тимер юллар да чери

Татарстан башкаласындагы 138 чакрым трамвай юлларының 74 чакрымы искергән. 20 чакрым трамвай юлы әле узган гасырның 70нче елларында ук салынган, куллану срогы инде ике мәртәбәгә узып киткән. Куәт бирүче 30 электр подстанциясенең дүртесе төзекләндерүгә мохтаҗ. Аларга 80нче еллардан бирле ремонт үткәрелмәгән.

– Казандагы трамвай юлларын, чыбык линиясен һәм электр хуҗалыгын капиталь төзекләндерү өчен 9 миллиард сум кирәк, – диде Айдар Абдулхаков.

Казанда көн саен линиягә 90 трамвай, 150 троллейбус чыга, метрода 15 состав хәрәкәтләнә.