“Fashion Iftar”да олы хаҗга юллама уйнатылачак

«Modest Covered» проекты авторы, әхлаклы мода өлкәсендә эксперт Җәннәт Минһаҗева билгеләп узганча, юбилей уңаеннан проектның инициативасы белән Казанда ун ресторанда бер үк вакытта хәйрия ифтары узды.

Шулай ук юбилей кысаларында Татарстанның Милли музеенда 11 март көнне татар хатын-кызлары костюмына багышланган “Җеп” күргәзмәсе ачылачак. "Җеп" атамасы очраклы гына сайланмады, нәсел, гаилә бәйләнешен аңлата, дип ассызыклап үтте Җәннәт Минһаҗева.

Быелгы ифтарның төп темасы татар традицияләре һәм культурасына багышланган булачак. Төп төсе исә – зәңгәр һәм зәңгәрсу булачак. Оештыручылар бу төсләр киемдә, аяк киеменнән тыш, 100 процент чагылырга тиеш дип белдерәләр.

Тагын бер яңалык – кунаклар арасында олы хаҗга юллама уйнатылачак. Волонтерлар арасында – гомрә хаҗына. “Fashion Iftar”ны оештыручыларның берсе Радик Абдрахманов быел да кунакларны тәмле ресторан сые һәм бүләкләр көтәчәген хәбәр итте.

Табын 1200 кешегә исәпләнеп әзерләнәчәк, диде ул. Иң зур бүләкләрнең берсе гыйбадәт бүлмәләрен бизәү белән шөгыльләнүче компаниядән булачак.

"Алар бер кунакка җария сәдакага ия булу мөмкинлеген бирәчәк, ягъни мәчеттә алар исеменнән гыйбадәт зонасы төзеләчәк", – дип сөйләде партнерлар буенча проект кураторы Эльза Зигантдинова. Чарага чыгыш ясарга Татарстанның халык артисты Эльмира Кәлимуллина чакырылган.