Фатыйх Сибагатуллинга багышланган китап дөнья күргән

Бөтендөнья татар конгрессының матбугат хезмәте һәм массакүләм мәгълүмат чаралары белән эшләү идарәсе җитәкчесе Гөлназ Шәйхи журналистларга хәбәр иткәнчә, әлеге китап 9 октябрьдә Камал театрында узачак Фатыйх Сибагатуллинны искә алу кичәсендә тәкъдим ителәчәк. 

– Үзем дә ышанып бетә алмыйм әлегә, Фатыйх Сәүбәновичка багышланган бу китапны ун минут элек кенә нәшрияттан кереп алдым. Китап аның турындагы истәлекләрдән тора. Ул үзе бик күп китаплар авторы. Ике дистәдән артык китабы бар. Ләкин монысы Фатыйх Сәүбәнович хакындагы бердәнбер китап. Басма Татарстан Рәисе Рөстәм Миңнехановның, беренче Президентыбыз Минтимер Шәймиевның һәм аның белән бергә эшләгән коллегаларының, депутатларның да фикерләре урын алган. Китапта шулай ук Фатыйх Сибагатуллинның гаиләсенә багышланган аерым бүлек тә бар, – дип сөйләде Гөлназ Шәйхи матбугат конференциясендә.

Фатыйх Сәүбәновичны искә алу кичәсендә ул яраткан җырчылар, аерым алганда Ришат Төхвәтуллин, Сиринә Зәйнетдинова, Фердинанд Сәлахов, Әсхәт Хисмәтов, Зилә Сөнгатуллина һәм башка җырчылар аның яраткан җырларын башкарачак, аның турында якты хатирәләр яңарачак һәм үзе иҗат иткән шигырьләр яңгыраячак. 

Россия Дәүләт Думасы депутаты ярдәмчесе, җәмәгать эшлеклесе Раил Шәмсетдинов Фатыйх Сибагатуллинны күпләрнең остазы-укытучысы булуын билгеләп үтте. “Нинди генә тармакны алма, ул аларның һәрберсендә эксперт иде. барыбыз өчен дә үрнәк шәхес булды”, – дип сөйләде ул.