Газ хезмәткәре Кыш бабай түгел, ләкин аны өйгә кертергә кирәк

Татарстанда быел газ җиһазларын куллану кагыйдәләрен бозган абонентларга 12 мең кисәтү ясалган, 10 меңнән артык фатирга газ бирү вакытлыча туктатылган.

– Быел сөрем газы белән агулануның 35 очрагы теркәлде, 68 кеше зыян күрде, кызганыч, 4 кеше һәлак булды. Газ аппаратларын үз белдегеңдә тоташтырырга ярамый, төгәлсезлекләр фаҗига чыгарачак. Газ җиһазларын, фәкать, газ хезмәткәре генә урнаштырырга хокуклы, – дип кисәтте “Газпром трансгаз Казань” җаваплылыгы чикләнгән җәмгыятьнең генераль директоры урынбасары Рәмис Сәлахов “Татар-информ” мәгълүмат агентлыгында үткәрелгән матбугат конференциясендә.

Газ җиһазларына елына 1 мәртәбә техник карау уздырыла. “Газпром трансгаз Казань” җәмгыяте 1,6 миллион фатирдагы 2,5 миллион газ җиһазларына хезмәт күрсәтә.

– Газ хезмәткәрен фатирга яки йортка аппаратларны тикшерергә кертмәгән өчен 5 мең сумнан 10 мең сумга кадәр штраф салына. Быел 268 кеше административ җавапка тартылды, – диде Рәмис Сәлахов.

Казандагы күп фатирлы 65 йортта (“хрущевка”) җилләтү каналлары тыгылган. Аларда сөрем газыннан агуланып үлү очраклары булды. Идарәче компанияләр хәзергә 55 йортта җилләтү каналларын чистартып төзекләндергән. Әлеге йортлардагы су җылыту колонкаларына газ кабаттан тоташтырылган.

– Яңа ел бәйрәмнәре көннәрендә газ плитәләрен кабызып, урамнарга чыгып китмәгез. Кечкенә балаларны газ плитәсе кабызылган өйдә үзләрен генә калдырмагыз. Бәйрәм фаҗига белән тәмамланмасын! – дип искәртте Рәмис Сәлахов.