Яфрак һәм ботакларны чүп контейнерына ташламагыз: штраф яный!

«Шәһәрләрдә каты көнкүреш калдыкларын төрләренә аерып җыярга өйрәнеп киләбез. Пластик савытларны, иске киемнәрне махсус әрҗәләргә салабыз. Ә агач ботакларын, чабылган үләнне, коелган яфракларны кая куярга?»

Ландыш Кәримова, Казан.

• «Гринта» төбәк операторының матбугат хезмәте җитәкчесе Лилия Мулюкова әлеге сорауга түбәндәге аңлатманы җибәрде:

— Үсемлек калдыклары каты көнкүреш калдыклары төренә керми. Шуңа күрә аларны полигоннарга алып китү төбәк операторы вазифаларына керми. Үсемлек калдыкларын каты көнкүреш калдыклары өчен куелган контейнерларга салу тыела. Моның өчен штраф түләттерергә мөмкиннәр. Бу кагыйдә Россия Хөкүмәтенең һәм Татарстан Республикасы Министрлар Кабинетының карарлары нигезендә расланган.

• Үсемлек калдыклары, шул исәптән коелган яфраклар, җәйге һәм көзге айларда аеруча күп җыела. Чыбык-чабык өемнәре һәм яфрак тутырылган капчыклар каты көнкүреш калдыкларын туплау мәйданчыкларын тиз арада томалап ала, махсус техниканың контейнерларга якын килүенә комачаулый.

Коелган яфраклардан һәм чабылган үләннән компост ясарга була. Соңыннан аны туфракны ашлау өчен кулланырга мөмкин. Агач ботакларын ваклатканнан соң, шулай ук бакчада файдаланып була. Бакчада кирпечтән салынган яки тимердән ясалган мич булса, ботакларны утын итеп тә кулланырга мөмкин.

• Күпләп җыелган агач ботакларын, чабылган үләнне һәм коелган яфракларны алып китү мәсьәләсендә идарәче компанияләргә яки җирле хакимият органнарына мөрәҗәгать итәргә кирәк.