«Ярдәм» бульвары яңара: күл тирәсендә 4 меңгә якын үсемлек, ял зоналары һәм уңайлы мохит булдырыла

Өч ел дәвамында этаплап яңартылган әлеге киңлек быел тулысынча үзгәрәчәк: күл тирәсе яшелләндерелә, яңа ял урыннары булдырыла, әлеге урын шәһәр халкы өчен тагын да уңайлыракка әйләнәчәк.

Бүгенге көндә бульварның дүртенче чираттагы эшләре күл тирәсендә алып барыла. Сулыкны яңарту «Сибур» компаниясе ярдәме белән башкарыла. Узган ел күл төбеннән 10 мең кубометр ләм һәм төрле калдыклар чыгарылган, сулык тирәнәйтелгән. Хәзер биредә суның чисталыгын саклаячак үсемлекләр утыртыла.

Күл тирәсенә барлыгы 170 агач, 2,8 мең чәчәк һәм 1,2 мең куак утыртылачак. Су буенда камыш, саз ирисы, тал, миләш, тирәк, өрәңге һәм төнбоеклар үсәчәк. Белгечләр әйтүенчә, бу үсемлекләр табигый фильтр ролен үтәп, суны чистартырга ярдәм итәчәк, шул ук вакытта күлгә үзенчәлекле матурлык бирәчәк.

Яңа бульварда ял итү өчен дә мөмкинлекләр артачак. Күл буенда күзәтү мәйданчыклары булган 200 метрга якын агач түшәмә, яктырту системасы, уңайлы юллар һәм аз хәрәкәтләнүче кешеләр өчен җайлаштырылган маршрутлар булдырылачак. Суга төшеп китү куркынычын булдырмас өчен, күл махсус корылма белән әйләндереп алыначак.

– Бу проект берничә программаны берләштергән комплекслы эш үрнәге. Бульвар гына түгел, аның тирәсендәге йортлар, ишегаллары да яңартыла, – дип билгеләп үтте Казан мэры Илсур Метшин.

Бульвар белән янәшә урнашкан 14 йортның фасадлары да төзекләндерелә. Аларның тышкы күренеше яңартыла, җылыту, буяу, балконнарны алыштыру һәм архитектура яктырткычлары урнаштыру эшләре башкарыла.

Исегезгә төшерәбез, «Ярдәм» бульвары сәламәтлеге чикле кешеләр өчен дә уңайлы итеп проектланган. Биредә рельефлы юллар, Брайль шрифты белән язылган мәгълүмат такталары, тотынгычлар һәм махсус җайланмалар каралган. Проект «Тормыш өчен инфраструктура» илкүләм проектының «Уңайлы шәһәр мохитен булдыру» программасы кысаларында тормышка ашырыла.

Август ахырына кадәр барлык эшләрне тәмамлау планлаштырыла. Шул рәвешле, моңа кадәр буш торган территориядә барлыкка килгән «Ярдәм» бульвары Киров һәм Мәскәү районнары халкының яраткан ял итү урынына әйләнәчәк.