Иң яхшы инженер исеме өчен ярыш: быел кем җиңүче булыр?

Яңа идеяләр, тормышыбызны җиңеләйтә торган эшләнмәләр, җитештерүдә кулланыла торган технологияләр — боларның һәркайсы артында инженер хезмәте тора. Татарстанда бу һөнәр ияләренә игътибарны арттыру, аларның казанышларын таныту һәм яшьләрне инженерлыкка җәлеп итү өчен махсус конкурс үткәрелә.

Кызыклы проектлар ничек туа?

«Ел инженеры» республика бәйгесе 2019 елдан башлап уздырыла. Татарстан сәнәгать һәм сәүдә министрының беренче урынбасары Родион Карпов сүзләренчә, барлыгы бу бәйгедә 2 меңнән артык кеше катнашкан, 213 белгеч җиңүче исеменә лаек булган. 

Конкурс кысаларында машина төзелеше, авиация сәнәгате, приборлар җитештерү, радиоэлектроника, робототехника, энергетика, химия, нефть химиясе, төзелеш, транспорт, авыл хуҗалыгы һәм башка юнәлешләрдәге 12 номинация каралган. Үз проектларын студентлар да, яшь белгечләр дә, күпьеллык тәҗрибәсе булган инженерлар да тәкъдим итә ала. 

Узган елларда тәкъдим ителгән иң кызыклы проектлар арасында түбән температуралы суыткычлар җитештерү технологиясе, пилотсыз очкычлар өчен кечкенә күләмле двигатель, бионик кул протезын кулланырга өйрәтүче тренажер, җәйге шиналар өчен махсус резина катнашмасы һәм башка проектлар бар.

Тәҗрибә бүләктән кадерлерәк

«Ел инженеры» бәйгесендә узган елда җиңү яулаган Тимур Петров сүзләренчә, конкурсның әһәмияте бүләк алуда гына түгел. Ул стажировка вакытында төрле өлкәләрдә хезмәт куючы белгечләр белән танышырга, тәҗрибә уртаклашырга, яңа идеяләр табарга мөмкинлек бирә.