Ясалма фәһем – ул машина, беренче планда – кеше

Анда Ислам хезмәттәшлеге илләренә кергән 21 илдән 50 медиа вәкилләре катнашты.
– Яңа технологияләр мәдәни мирасны саклауда кулланыла. Илләрнең массакүләм мәгълүмат чаралары арасында үзара тиң хезмәттәшлек мөһим, – диде Татарстан Рәисе ярдәмчесе Марат Гатин.

Ислам хезмәттәшлеге илләренең мәгълүмат департаменты директоры Тарек Ладжал тарихны һәм дөреслекне сакларга чакырды.
– Мирас коды – безнең киләчәк, ә журналистлар – киләчәкне төзүче архитекторлар, – диде Тарек Ладжал.

RT генераль директоры Вера Харина Татарстанда милләтара һәм динара дуслык хөкем сөрүен мактап телгә алды, махсус хәрби операциядә катнашучылар турында документаль фильмнар төшерүләрен әйтте.
– Казан форумы әһәмиятле мәйдан, эшчәнлеккә яңа мөмкинлекләр ача. Татарстан Рәисе Рөстәм Миңнеханов, шулай ук “ТАТМЕДИА” агентлыгы теләктәшлек күрсәтә. Казан – дөньяның бай мәдәни мираслы шәһәре. Россия медиачелтәре ышанычлы һәм абруйлы, – диде Ислам хезмәттәшлеге илләренең мәгълүмат агентлыклары берлеге директоры Мөхәммәд Әльями.

ВГТРК генераль директоры урынбасары Рифат Сабитов үзенең чыгышында Россиядә 20 миллион мөселман яшәвен искәртте, ә дөньяда мөселманнар – 2 миллиард кеше.
– Ясалма фәһем ул – машина, беренче планда – кеше. Журналистика кешегә хезмәт итәргә тиеш, – диде Рифат Сабитов.

Казан форумын 400 журналист яктырта: Россиядән һәм чит илләрдән.
– Казан 2026 елда Ислам хезмәттәшлеге илләренең мәдәни башкаласы статусында. Республикада төрле милләтләр дуслыкта яши һәм диннәр арасында татулык саклана. Массакүләм мәгълүмат чараларының хезмәттәшлеге илләрнең дуслыгына файда итә, – диде “ТАТМЕДИА” матбугат һәм массакүләм коммуникацияләр буенча республика агентлыгы җитәкчесе Айдар Сәлимгәрәев. 

Чыгыш ясаучылар традицион кыйммәтләрне саклауның, ялган хәбәрләрне фаш итүнең, үзара хезмәттәшлекнең мөһимлеген искәртте.