Кабан күле ярларында чәйләр эчеп утырганнар

Казанда Мәрҗани урамы буенча Түбән Кабан күле ярларына 304 агач утыртылды. Болар: шомырт, тал, өрәңге, нарат, алмагач һәм башка агачлар. Биредәге “урманлык” әле тагын 282 агачка артачак. Күл буендагы Камал театрының яңа бинасы тирәсенә дә 530 агач утыртылган иде.

– Түбән Кабан күле ярлары – безнең иң әһәмиятле һәм яраткан проектларның берсе. Эшкә керешкәндә биредәге җирлек никадәр үзгәреш кичерәчәген бик аз гына кеше күзаллагандыр, мөгаен. Хәзер яр буйлары казанлыларны һәм кунакларны үзенә җәлеп итә торган ноктага әверелде. Киләсе елда күл тирәли тоташ җәмәгатьчелек мохите барлыкка китереләчәк. Кабан күле илебездәге иң матур яшел зоналарның берсе булачак, – диде Казан мэры Илсур Метшин. 

Яшелләндерү белән беррәттән Кабан күле ярларына агач сукмаклар, пирс, баскычлар һәм рәшәткәләр ясала, шулай ук күзәтү мәйданчыклары төзелә. Яр буйларын төзекләндерүнең 3нче этабын 30 августка тәмамлау планлаштырылган.

Казанда Иске-Татар бистәсен яңарту проекты кысаларында, 2013 елда Мәрҗани урамының бер өлешенә төзекләндерү үткәрелде. Кабан күле ярларын төзекләндерүгә 2016 елда керешелде. Планлаштырылган эшләрнең үтәлеше 80 процентны тәшкил итә. 

Иске-Татар бистәсе ветераннары сөйләгәнчә, гаиләләр әле 1950 елларда да Кабан күле буйларына самоварлар алып чыгып, чәйләр эчеп, ял итеп утыра торган булганнар.

Фотоны Татарстан Республикасы шәһәрләрен

үстерү институты тәкъдим итте