Каһвә эчү гадәте үзгәрә: кофейнялар урынына кибетләргә йөрибез

Дөньякүләм каһвәләрнең популярлыгы кимүгә минем ни катнашым бар икән? Ни әйтсәгез дә, соңгы вакытта эчелми ул каһвә дигәннәре. Бу хакта күптәннән язарга уйласам да, каһвә мәсьәләсе ачык калды. Дөресрәге, безнең каһвә эчүгә карашыбыз үзгәрә башлады бугай.

Узган ел каһвәнең рекордлы кыйммәтләнүеннән соң, 2026 елның беренче яртыеллыгында каһвә базарында бераз тынлык булып алды. Шул вакытта кулланучы да үзгәрде. Хәзер каһвәне иркенләп эчеп утырырга ара юк. Кечкенә нокталарда сатылган каһвәне аягүрә эчү, я паркта утырып эчү модага керә башлады. Халык каһвәне ешрак әнә шундый махсус кечкенә сату нокталарыннан ала хәзер.

Дөнья бәяләренең көчле үсеше Россия базарында да чагылды. Кибетләрдә каһвә кыйммәтләнде. Без аны күбрәк җәмәгать туклану урыннарында эчә башладык. Август-декабрьдә каһвәгә бәяләр сум чагылышында салмак үсәчәк, әмма аларның үсеше өлешчә дөнья бәяләренең көчсезләнүе белән тоткарланачак. Беренче яртыеллыкта каһвә бәясен стабильләштерү аның кофейняларда һәм кафеларда арзанаюына китермәде.

Сәбәбе җитештергәндә өстәмә чыгымнар артуына бәйле диләр. Үзебезнең җитештерүчеләр һәм каһвәханәләр Бразилиядән һәм Көньяк-Көнчыгыштан китерелгән чимал белән эшлиләр. Аларны кыздыруга һәм төргәкләргә төрүгә, сөт продукциясенә, арендага һәм хезмәт өчен түләүгә өстәмә чыгымнар да өстәлә, дип билгели экспертлар.

Мондый вәзгыятьтә күп кулланучылар каһвә эчүнең арзанрак вариантларын сайлап, экономия режимына күчә. Россиядә каһвә кулланучылар күп. Каһвәдән дә баш тартырга җыенмыйбыз. Әмма аны сату, тәкъдим итү ысуллары үзгәрә. Күпләр кофене өйдә куллануга күчте. Каһвәне өйдә куллану моделенә күчү шулай ук кофеваркалар һәм кофемашиналар сату үсеше белән раслана 2026 елның беренче яртыеллыгында аларны сату 13 процентка арткан.

Гади дә, ансат та

Быел ваклап сатуда барыннан да активрак эри торган каһвә сату үскән. Аның куллануының 86 проценттан артыгы өйдә кайнатуга туры килә. Шулай ук пакетлардагы каһвәгә кызыксыну артуын билгеләп үтәләр. Бу продуктның төп сатып алучылары булып мегаполисларда яшәүче актив яшьләр тора икән.

Шул ук вакытта Россиядә кофеиннар һәм катнаш форматлар базары үсүен дәвам итә. Бер ел эчендә шундый оешмалар саны 7 процентка арткан.

Каһвә базары классик каһвәханәләр хисабына түгел, ә төрле сату нокталар ачу хисабына үсә, дип саныйлар белгечләр. Сатып алучылар мондый форматны хезмәт күрсәтү тизлеге һәм түбәнрәк бәяләр өчен сайлый икән.

Классик кофейнялар саны исә Россиядә гомумән якынча 13 процентка, 7,7 мең оешмага кадәр кимегән, Мәскәүдә — якынча 12 процентка. Ә барыннан да элек каһвәгә йөз тоткан нокталар саны үсүен дәвам итә. Әзер каһвәне азык-төлек челтәрләрендә һәм өй янындагы кибетләрендә сатып алучы россиялеләрнең өлеше өч ел эчендә 17проценттан 35 процентка кадәр арткан. Бу шартларда хәтта кофе сату ноктасы күрше кофейня белән генә түгел, ә супермаркеттагы автомат белән дә көндәшлек итә ала.

Җылы атмосфера эзләп

Шул ук вакытта классик каһвәханәләрнең бөтенләй юкка чыкмаячак. Биредә каһвә чынаягы гына түгел, ә кешенең бу урында үткәргән вакыты да сатыла. Бу урынга каһвә эчәргә генә түгел, тыныч атмосфера өчен дә киләләр. Күп кенә егетләр уңайлы шартларда каһвә салынган компьютер артында эшләргә, бизнес-очрашу уздырырга килә. Белгечләр әйтүенчә, көзлектә яллардан кайта башлыйлар һәм килүчеләр саны гадәттә арта икән.

Каһвәханәләр яңа аудиторияне җәлеп итәргә тырышалар. Беренче чиратта төрле акцияләр үткәрү күздә тотыла. Мәсәлән «дустыңны алып кил — бушлай кофе ал» кебек. Шул ук вакытта файдалы каһвә кебек яңа позицияләр дә үсәчәк. Мондый кызыксынуларга ихтыяҗ арта гына бара икән.

Зифа Шәйдуллина.