Рөстәм Миңнеханов Россия Герое Рамил Ибәтуллинны 50 яшьлек юбилее белән котлады

«Сезнең исемегез хаклы рәвештә какшамас батырлык, чын патриотизм, хәрби бурычка, үз халкыгызга һәм Ватанга тугрылык символына әверелде», — диелә котлау адресында.

Рөстәм Миңнеханов билгеләп үткәнчә, Казан хәрби уку йортын тәмамлаган Рамил Ибәтуллин туган уку йортының һәм Россия офицерлыгының иң яхшы традицияләрен дәвам итә.

«Илебезнең оборона сәләтен һәм иминлеген ныгытуга, гомуммилли бурычларны хәл итүгә, Ватанны лаеклы саклаучыларның яңа буынын тәрбияләүгә керткән өлешегезне бәяләп бетереп булмый», — дип ассызыклаган Татарстан Рәисе.

Юбилярның хезмәт юлы һәм хәрби казанышлары күпсанлы дәүләт һәм сугышчан бүләкләр, шулай ук Россия Герое исеме белән билгеләп үтелгән.

Рөстәм Миңнеханов Рамил Ибәтуллинга хезмәттәшләренең ихтирамы һәм Татарстанда, аннан читтә дә казанган абруе алга таба да көч-куәт бирүен теләгән.