9 яшьтән вейп тарта башлыйлар. Табиблар куркыныч турында кисәтә

Элек бу авыру күп еллар тәмәке тартучыларга гына хас дип саналса, хәзер пульмонологларга 16-40 яшьлек кешеләр дә мөрәҗәгать итә. Аларны тамак кибү, авырту, ютәл, тын кысылу, күкрәктә сызгыру кебек билгеләр борчый.

Вейплар авыру куркынычын 50 процентка арттыра

ХОБЛ — дөньяда үлемгә китерүче сәбәпләр арасында өченче урында тора. Ел саен әлеге авырудан якынча 3 миллион кеше үлә. Россиядә рәсми рәвештә 800 мең очрак теркәлгән, әмма чынлыкта, авыручылар саны 10 миллионга кадәр җитәргә мөмкин.

Электрон тәмәке тартуның ХОБЛ куркынычы белән бәйләнеше дә расланган. 17 тикшеренүне берләштергән күзәтү нәтиҗәләре күрсәткәнчә, вейплар куллану бу авыруның үсеш куркынычын якынча 50 процентка арттыра.

Аеруча зур куркынычларның берсе — «попкорн үпкәсе» дип аталган авыру. Аны нәтиҗәле дәвалау ысулы юк. Кискен сулыш җитешсезлеге үсеш алган очракларда үлем куркынычы 30-50 процентка җитә.

Гомумән алганда, Россиядә вейп куллануга бәйле өзлегүләр саны бер ел эчендә 30 процентка арткан, күбрәк 35 яшькә кадәрге кешеләр зыян күрә. Электрон тәмәкенең аэрозолендә никотин, яман шеш китереп чыгарырга сәләтле матдәләр һәм хром, никель, кургаш кебек агулы металлар бар. Ә хуш ис бирү өчен кулланыла торган диацетил үпкәнең җитди зарарлануына, шул исәптән «попкорн үпкәсе» авыруына китерергә мөмкин.

Балалар вейпка 9-11 яшьтән үк ияләшә

Белгечләрне аеруча борчыганы — балаларның электрон тәмәкегә бик иртә ияләшә башлавы. Аны 9-11 яшьтән үк куллана башлаучылар бар. Шуңа күрә табиблар яшьләр арасында үпкә авыруларының кискен артуын көтә.