Казан юлларына быел 21,5 миллиард сум акча «күмелгән»

– Татарстан Рәисе һәм федераль үзәк теләктәшлегендә юлларны төзекләндерүдә һәм транспорт инфраструктурасын үстерүдә колачлы эшләр гамәлгә ашырылды, – дип хәбәр итте Казан шәһәре Башкарма комитеты җитәкчесе урынбасары Игорь Куляжев “эшлекле дүшәмбе” киңәшмәсендә.

Юллар төзү-төзекләндерү мәсьәләсенә карата Казан мэры Илсур Метшин да үзенең мөнәсәбәтен белдерде.

– 21,5 миллиард сум, дөрестән дә, зур сан. Бу кемгәдер артык күп тоелыр, ләкин әлеге сан нәкъ республикабыз башкаласының югары статусына тәңгәл рәвештәге урам-юл челтәрен тиешле дәрәҗәдә тотарга һәм үстерергә мөмкинлек бирә. Миллионлы шәһәрдә юл төзекләндерүләрне тулы колачка алып бару – зур мәсьәлә һәм хезмәт. Эш колачы белән бергә безнең предприятиеләр дә үсте һәм аларның һөнәр төрләре дә артты. Без бүген юл өслеген алмаштырып кына калмыйбыз, юл-транспорт челтәрен колачлырак итеп төзекләндерәбез, – диде мэр Илсур Метшин.

Казанның шактый еллар чикләнгәнрәк бюджет шартларында торганлыгын да искәртте ул.

– Илебез әйдаманы Владимир Владимирович Путин башлангычындагы илкүләм проектларның берничәсе гамәлгә ашырыла хәзер. Әлеге проектларның берсе – юл төзелеше. Тырышлыгы өчен шулай ук Татарстан Рәисенә дә зур рәхмәт! Ул һәр шимбәдә эшләрнең барышын тикшерә, юл-төзелеш комплексына аеруча игътибар бирә. Шунлыктан, Казан юлларының 85 проценттан артыгы норматив халәттә бүген, – диде мэр Илсур Метшин.

Игорь Куляжев сөйләгәнчә, “Тормыш өчен инфраструктура” илкүләм проекты кысаларында башкаланың Сахалин, Воровский, Октябрь, Ә. Еники, Г. Камал, Товарищеская, Курашов һәм башка урамнары юллары төзекләндерелде. Юл өслеген яңарту белән беррәттән тротуарлар да төзекләндерелде, яктырткычлар куелды, велосипед юллары ясалды.

Болак аша салынган 2 күпер: К. Нәҗми урамы турысындагы Романовский күпере һәм Достоевский урамы турысындагы күпер яңартылды.

Татарстан Рәисе башлангычындагы республика программасы кысаларында, быел Казанның 40 бистәсендә 102 урам юлы төзекләндерелде. Бу эшләргә барлыгы 3 миллиард сум тотылган. 34 торак җирлектә 40 миллион сумга 900 яктырткыч куелган. Соңгы 6 елда 27 бакчачылык ширкатенә асфальт юллар сузылган.

– Шәһәр инфраструктурасын яңартуда эш тизлеген киметмибез. Бу өстенлекле бурыч, ул казанлыларның тормышына файда китерә, – диде Игорь Куляжев.