Казан кар-буранга каршы контрһөҗүмгә күчте

Татарстан башкаласында биш көн эчендә айлык норманың 70 проценты күләмендә явым-төшем күзәтелде. Белгечләр исәпләвенчә, беренче категориядәге юлларга 1,1 миллион тонна кар яуган.

Хәрәкәт туктамады

– Стихия Казанга гына түгел, ә бөтен республикага җитди сынау ясады. Карның күпләп явуы кешеләргә һәм техникага зур йөк булып әверелде. Аномаль шартларга карамастан, транспорт хәрәкәтенең туктап калуына юл куелмады: җәмәгать транспорты эшли, хәрәкәт саклана, – диде Казан мэры Илсур Метшин “Эшлекле дүшәмбе” киңәшмәсендә.

Шәһәр башлыгы әйткәнчә, 1 февральдә эшкә рекордлы санда техника җәлеп ителгән: урамнарга 1 354 берәмлек махсус техника чыккан. Гадәттә, кышкы көннәрдә урамнарны җыештыруда 160–170 машина гына эшли.

Предприятиеләргә рәхмәт!

– “Буран” планы кысаларында шәһәрдәге предприятиеләр һәм оешмалар техникасы да җәлеп ителде. Алда эш колачы зур әле, әмма инде хәзерге этапта ук предприятиеләргә һәм муниципаль унитар предприятиеләргә рәхмәт белдерергә кирәк. Хезмәткәрләр тәүлек буе эшли, өйләренә кайтып та тормый диярлек. Казанлыларның ярдәме дә әһәмиятле: волонтерлар, кешеләр көрәк тотып ишегалларын чистартырга чыга, – диде мэр Илсур Метшин.

Шәһәр башлыгы Татарстан Республикасы буенча Эчке эшләр министрлыгы һәм ЮХИДИ хезмәткәрләренең ярдәмен дә аерым билгеләп үтте. Автоинспекторлар коммуналь машиналар эшли алсын өчен, урам юлларын автомобильләрдән арындырып торган.

Вакытлы кар таулары

Гыйнвар аенда Казан урамнарыннан 474 мең тонна кар чыгарылган. Бу – әлеге кышның узган биш аендагы күрсәткечтән ике тапкыр күбрәк. Кыш башыннан бирле шәһәрдән 593 мең тонна кар чыгарылган. Кар эретү пунктлары ике тапкыр зуррак көчәнештә эшли. Урам юлларын чистартуны тизләтү максатыннан 17 урында кар туплау өчен вакытлы мәйданчыклар булдырылган.

Юл читенә “кунаклама”

– Урам юллары читләренә куеп калдырылган автомобильләр коммуналь тармак эшчеләренә комачаулый. Шуның аркасында юл читләрендәге 200 автомобиль штраф мәйданчыгына алып кителде. Автомобильләрне башка урынга күчерүне сорап, социаль челтәрләр аша да хәбәрләр урнаштырыла, – диде Казан шәһәре Башкарма комитеты җитәкчесе урынбасары Игорь Куляжев.

Җир астында кар юк

Буранлы көннәрдә күп кешеләр метроны сайлады. Метрополитенга өстәмә составлар куелды, нәтиҗәдә хәрәкәт аралыгы кыскарды, станцияләрдә пассажирлар күпләп җыелмады. Бер атна эчендә Казан урам юлларына 8 мең тонна реагент сибелгән.

Мэр Илсур Метшин эш темпын киметмәскә чакырды. Алдагы көннәрдә төп көчләр тротуарларны һәм торак кварталларны җыештыруга юнәлтеләчәк. Казанда “Буран” планы 4 февральгә кадәр озайтылды.

Ишегалды – “техника паркы”

Казанда ишегаллары автомобильләр белән шыплап тулган. Кайбер машиналар кар астында көздән бирле “кышлый”. Коммуналь техника эшли алсын өчен, ишегалларында иркенлек юк. Берничә киң күңелле волонтерның ишегалдын җыештыручыга ярдәмгә чыгуы гына мәсьәләне хәл итә алмый.

Германия, Голландия һәм Швейцария шәһәрләрендә, мәсәлән, ишегалларына автомобильләр бөтенләй кертелми. Казанда да 5–6 йортка бер күпкатлы гараж-корылма төземичә торып, ишегалларын автомобильләрдән бушатып булмаячак.

Дамир Бәдриев фотосы