#Җәмгыять 19 февраль 2025, 13:14

“Казан” халыкара аэропорты Россиядә иң яхшыларның берсе

19 февраль 2025, 13:14

Татарстанның “Казан”, “Бегишево” һәм “Бөгелмә” аэропортлары узган ел 6 106,5 мең пассажирга хезмәт күрсәткән.

Скопировать ссылку

“Казан” халыкара аэропорты Россиядә иң яхшыларның берсе

– Республика аэропортларыннан 97 юнәлештә очышлар башкарыла. Аларның 52се – эчке, ә 45е халыкара юнәлешләр. Татарстан бюджетыннан 34 авиамаршрутка субсидия бирелә, ягъни, финанс яктан ярдәм күрсәтелә. Кытай Халык Республикасы белән килешенү нигезендә Казан-Шанхай авиа элемтәсе булдырылды, – диде Транспорт һәм юл хуҗалыгы министрлыгының транспорт идарәсе җитәкчесе Мария Захватова “Татар-информ” мәгълүмат агентлыгында үткәрелгән матбугат конференциясендә.

Габдулла Тукай исемендәге “Казан” халыкара аэропортының коммерция директоры Андрей Лопатин таныштырганча, аэропорт инде икенче ел рәттән 5 миллионлы пассажир чиген узып эшли.

– Мәскәү, Санкт-Петербург, Махачкала, Истанбул, Шарм-эш-Шейх юнәлешләрендә авиапассажирлар аеруча күп. “Казан” аэропортыннан 31 эчке һәм 51 халыкара юнәлештә очышлар башкарыла, – диде Андрей Лопатин.

Армения авиакомпаниясе Ереван-Казан маршрутын гамәлгә ашырган. Татарстанның “ЮВТ АЭРО” авиакомпаниясе Ташкентка, шулай ук Ред Вингс авиакомпаниясе Батумига рейслар ясый. Таиланд һәм Гоа юнәлешләрендә очышлар торгызылган.

– “Казан” халыкара аэропорты Россиядә иң яхшыларның берсе. Шунлыктан, аны ерак араларга очучы пассажирлар өчен хаб, ягъни, күченеп утыру мәйданы итеп сайладык. Көнчыгыш төбәкләрдән Мәскәүгә кадәр очып килеп, күченеп утырып, юлны дәвам итү озакка да һәм кыйммәткә дә төшә. Казаннан төбәкләргә һәм чит илләргә очу арасы күпкә азрак та, арзанрак та, – диде “Северный ветер” (Nordwind Airlines) авиакомпаниясе генераль директоры урынбасары Антон Маттис.

Туристлык буенча дәүләт комитеты рәисе урынбасары Айгөл Балахонцева:”Татарстанда 4 корылма ЮНЕСКОның бөтендөнья мирасы исемлегенә кертелгән. Кунакханәләрдә 27 мең номер бар. Туристлар агымы елдан-ел арта. Рәхим итсеннәр, республика халкы кунакчыл, бездә тарихи урыннар күп”, – диде.

Кызыклы яңалыкларны күзәтеп бару өчен безнең МАХ каналына кушылыгыз.