Казанга “Үлемсез полк” кабат кайта

Җиңү көнендә Казанда “Үлемсез полк” йөреше кабаттан үткәрелә башлый. Соңгы 2 елда әлеге акция онлайн рәвештә генә оештырылган иде.

– Иртәнге якта Архангель һәм Арча зиратларында сугышчылар каберлекләренә чәчәкләр салына. Җиңү паркында Мәңгелек утка, Совет Солдаты, Тыл хезмәтчәннәре, аналар һәм тол хатыннар һәйкәлләренә, махсус хәрби операциядә катнашучылар хөрмәтенә төзеләчәк мемориал урынына чәчәкләр китерелә, – дип хәбәр итте шәһәр Башкарма комитеты җитәкчесе урынбасары Гүзәл Сәгыйтова.

Меңьеллык мәйданында иртән Җиңүнең 80 еллыгына багышлап Казан гарнизоны парады була. Механикалаштырылган колонна башында легендар “Колхозник Татарстана” Т-34 танкы бара. Парадта заманча Т-90М “Прорыв”, Т-80БВМ һәм Т-72 танклары, “Терминатор”, шулай ук башка хәрби техника катнаша. Парадтан соң тамашачылар Т-14 “Армата”, БТР-80 хәрби техникасын якыннан карый ала.

Бауман урамында Муса Җәлил урамыннан Университет урамына кадәрге өлештә ачык һавада интерактив музей эшли. Шаляпин һәйкәле янында мәктәп тынлы оркестры, Казан мәчесе һәйкәле янында студентлар коллективлары чыгыш ясый. “Ногай” кунакханәсе балконы Казан шәһәр филармониясе артистлары сәхнәсенә, ә 50нче йорт балконы музыкаль-поэзия кичәсенә әверелә.

Җиңү паркында өлкән сыйныфлар укучылары парады, “Җиңү фанфаралары” фестиваленең гала-концерты, профессиональ һәм үзешчән артистлар чыгышлары планлаштырылган.

Исегезгә төшерәбез: Татарстан Рәисе Рөстәм Миңнеханов май бәйрәмнәрендә иминлек мәсьәләләренә игътибарны көчәйтергә кушты.