Күп кенә аналарның бала карау чоры тулы күләмдә исәпкә алынмаган. Пенсияләре яңадан исәпләнә

Теләче районыннан газета укучыбыз шалтыратты. “Социаль фондтан хат килгәч, районның социаль яклау бүлегенә бу нинди хат дип мөрәҗәгать иткән идем, без андый эчтәлектәге хатлар җибәрмибез, Пенсия фондына хәбәргә чыгыгыз, диделәр. Хатта Социаль фонд диелгән, ул нинди оешма? Мин инде күптәннән лаеклы ялда, балаларымның документлары Пенсия фондында бар дип беләм. Анда интернет аша документлар җибәрергә була диелгән. Бу ялган оешма түгелме? Миңа документлар тапшырырга кирәкме?” Гөлфия апагыз. 

Газета укучыбызны тынычландырырга ашыгабыз, дөрестән дә, Пенсия фонды хәзер Социаль фонд дип атала. Әлеге сорауга ачыклык табу максатыннан без Россия Социаль фондының Татарстан Республикасы буенча бүлегенең матбугат үзәге белән элемтәгә кердек.  

2026 елның 1 гыйнварыннан пенсия законнарына кертелгән үзгәрешләр нигезендә, биш һәм аннан да күбрәк баласы булган әти-әниләрнең берсенә, балаларын 1,5 яшькә кадәр караган чор өчен 8,1 коэффициент хезмәт стажы исәпләнергә мөмкин.

Шул уңайдан 2025 елның 1 декабреннән Татарстан Социаль фонды биш һәм аннан да күбрәк баласы булганнардан гаризалар кабул итә башлый. Ягъни, мәсәлән, шул гариза нигезендә, иминият пенсиясен алучы хатын-кызларның пенсия күләмен кабаттан карыйлар. Иминият пенсиясен билгеләгәндә, биш һәм аннан да күбрәк баласы булганнарның пенсияләрен исәпләгәндә балалары исәпкә алынмаган булса, пенсия күләме артырга мөмкин.  

“Күп кенә аналарның бала карау чоры тулы күләмдә исәпкә алынмаган. Бу аларның пенсия суммасына йогынты ясаган. Пенсияләрен яңадан исәпләү яисә яңадан билгеләү хокукына ия булган 14 меңнән артык хатын-кызны ачыклап, аларга хатлар җибәрелде. Без күп балалы әниләргә фондның клиентлар белән эшләү бүлегенә мөрәҗәгать итеп, тиешле документлар белән гаризалар бирергә чакырабыз”, – ди Россия Социаль фондының Татарстан Республикасы буенча бүлек җитәкчесе Эдуард Вафин.  

Гаризаны РФ “Дәүләт хезмәтләре” порталы аша да бирергә була. Моның өчен үзеңнең шәхси битеңә кереп, гариза язарга кирәк. Татарстан Социаль  фонды җибәргән хатта, ничек итеп гариза җибәрү схемасы җентекләп аңлатылган. Шулай ук районнарда урнашканнар күпфункцияле үзәкләр (МФЦ) аша һәм яшәү урыны буенча Социаль фондның клиентлар белән эшләү хезмәтләренә дә мөрәҗәгать итәргә була. Үзегез белән паспорт, шулай ук балаларыгызның тууын, яшен раслаучы документлар – туу турында таныклык, паспорт кебек документлар алып килергә онытмагыз. Гариза декабрь аенда бирелгән очракта, пенсия 2026 елның гыйнварында яңадан исәпләячәкләр һәм ул артып килергә дә мөмкин.