Марат Әхмәтов: “Динебез – ислам, кыйблабыз – Коръән”

Бәйге “Казан – Ислам дөньясының мәдәни башкаласы” программасын башлап җибәрде. Халыкара Изге Коръән премиясе – дөньядагы иң яхшы Коръән укучыларга тапшырыла. Бәйгенең финалына Индонезия, Малайзия, Йемен, Катар һәм Үзбәкстаннан катнашучылар чыкты. 

– 1980 еллар дәверендә рухи дөньябыз бик зур үзгәрешләр кичерде. Без үзебезнең кыйблабызны югалткан идек. Көнчыгыш илләрен кыйбла итеп күрсәттеләр. Соңыннан, 2000 елларда, кыйблабызның дин икәнен аңладык. Хәзер дә елдан-ел дингә якыная барабыз. Ислам дөньясы илебезнең хәлен һәм хаклыгын дөрес аңлый. Динебез – ислам, кыйблабыз – Коръән, – диде Дәүләт Советы рәисе вазыйфасын башкаручы Марат Әхмәтов.  

Россия мөселманнары Диния нәзарәте рәисе Равил хәзрәт Гайнетдин халыкара дәрәҗәдәге бәйгегә әзерлекне югары бәяләде.

– Казандагы яңа биналарны күреп шаккаттым, бик горурланам. Казан чәчәк ата. Бу залга килеп кергәч тә Россиянең төрле тарафларыннан килгән мөфти-имамнарны күреп сөендем. Казан – ислам илләренең мәдәни башкаласы булырга әзер. Биредә Казанның бай тарихы, рухи мирасы, бүгенгесе һәм киләчәге чагыла. “Казан – ислам илләренең мәдәни башкаласы” программасын Аллаһ сүзе – Коръән уку белән башлап җибәрдек. Аллаһ Тәгалә бәрәкәтен, ярдәмен бирсен, – диде Россия мөселманнары Диния нәзарәте җитәкчесе Равил хәзрәт Гайнетдин.

 Бәйге нәтиҗәләре буенча, беренче урынны Индонезиядән Имран Әл-Карим яулап алды. Икенче урында – Йемен, өченче урын – Малайзия, дүртенче урын – Үзбәкстан, бишенче урын – Катардан катнашучылар булды. 

Искәртеп үтәбез: “Казан – ислам илләренең мәдәни башкаласы” программасының рәсми ачылу тантанасы 2026 елның 14 маенда узачак. Татарстан мәдәният министры Ирада Әюпова сүзләренчә, бәйрәм чаралары «Россия – Ислам дөньясы: KazanForum» халыкара икътисадый форумы кысаларында һәм ел дәвамында да узачак.