“Мәрхәмәт – Милосердие” кунаклар каршыларга әзерләнә

Ятим балалар йортларында да, караучысыз картлар янында да алар еш кунак, көтеп кенә торалар үзләрен. Шуңа да бу шәфкатьле хатын-кызлар төркемен республикабызда күпләр белә.Тиздән бу оешма хакында бар дөньяга да билгеле булачак.

Казаныбызда үтәчәк “Россия-Ислам дөньясы KazanForum 2025” ХVI Халыкара икътисадый форум кысаларында “Хатын-кыз карашы” трегы-мәйданчыгы  уздыруны да алар бергәләп башкарачаклар.  Бу хакта әлеге оешманың җитәкчесе Алсу Нәбиева журналистларны таныштырды. 87 илдән  20 меңләп кунак киләчәк. Эшлекле программада 20 юнәлеш буенча 130 чара көтелә. Араларында Ислам илләреннән бик уңышлы мөслимәләр дә булачак.

Алар тәҗрибәләре белән уртаклашачак. Хатын-кыз (күбесе әни бит алар) җыелган җирдә игелек шәфкать һәм хәйриячелекнең  алгы планга чыгачагы билгеле инде. Мондый масштаблы чара “Мәрхәмәт – Милосердие” хатын - кызлары инициативасы белән өченче ел рәттән уздырыла инде. Республикабыз Рәисе Рөстәм Нургали улы Миңнеханов ел саен бу форумда хатын-кызларның әлеге трегына үзе ярдәм итә, 2023 елда үзе килеп танышып карап сокланып йөргән. Ә инде 2024 елдагысында чыгыш ясаучы эшлекле хатын-кызлар белән очрашу уздырган. Андый аралашу быел да көтелә. 

Быелгы форумда катнашучыларның яртысы диярлек 49 проценты чит ил вәкилләре. Бу үзе үк кызыксынуның артуы турында сөйли. Күвейт, Марокко, Оман, Катар, Иордания, Һиндстан, Зимбабве, Камерун, Берләшкән Гарәп Әмирлеге, Үзбәкстан, Кения, Гана илләреннән дә хатын-кызлар киләчәк. Алар барысы да үз милли киемнәрен киеп килә, димәк, башкалабыз күзләрне камаштырырлык аллы-гөлле төсләрдән балкып торачак. Эшлекле сөйләшүләрнең нәтиҗәсе тормышыбызны яхшыртуга, хәйриячелекнең модага керүенә ярдәм итәр дип тә өметләник.

Форум Татарстан Рәисе Рөстәм Миңнеханов теләктәшлегендә уза.