“Милли тормыш һәм дин” җыены – илнең барлык татар дин әһелләрен туплаган бердәнбер чара

Бөтендөнья татар конгрессы Башкарма комитеты җитәкчесе Данис Шакиров билгеләп узганча, әлеге җыен – илебезнең барлык татар дин әһелләрен туплаган бердәнбер чара. Җыенда илнең 78 төбәгеннән 1071 делегатның, шул исәптән Татарстаннан 131 кешенең катнашуы көтелә, дип хәбәр итте ул.

Җыенда катнашучыларны бай чаралар көтә. Беренче көнне алар “Казан” агросәнәгать паркына “Russia Halal Expo” халыкара күргәзмәсе кысаларында уза торган “Хәләл” күргәзмәсе белән танышачак. 16 майда төп чара – Татарстан Рәисе Рөстәм Миңнеханов катнашында пленар утырыш көтелә. Ул “Казан экспо”да узачак.

– Шул ук көнне Бөтендөнья татар конгрессы каршында эшләп килүче татар дин әһелләрен туплаган координацион совет карары нигезендә бүгенге көндәге актуаль мәсьәләләрне чагылдырган биш дискуссион мәйданчык эшләячәк. Алар: “Хәләл өлкәсендә бүгенге вазгыять”, “Мәчет-мәдрәсәләрдә дини һәм милли мәгариф”, “Иске имля – язма мирасыбыз: аны өйрәнү һәм өйрәтүдә заманча алымнар”, “Дини оешмаларда һәм уку йортларында рухи мирасны барлау һәм таныту”, “Динне, милли мәдәниятне, туган телне һәм гаилә кыйммәтләрен саклауда татар хатын-кызларының роле”. Соңыннан делегатлар өчен Иске татар бистәсенә, Тукайның әдәби музеена, татар зиратына, “Хәзинә” милли сәнгать галереясына һәм Иске Таш мәчеткә экскурсияләр оештырылачак. 17 майда инде без аларны “Изге Болгар җыены”на алып барачакбыз. Шунда ук “Тәүбә” мәрасимендә катнашачаклар, – дип сөйләде Данис Шакиров.  

Бөтендөнья татар конгрессы Башкарма комитеты җитәкчесенең беренче урынбасары Марс Тукаев әйтүенчә, быел җыенга Кырым республикасыннан, Донецк халык республикасыннан да делегатлар киләчәк. Быел беренче тапкыр Запорожье, Липецк һәм Орёл өлкәләре вәкилләре дә катнашыр дип көтелә.

Фото: http://tatar-congress.org