Муса Җәлилгә багышланган «Кара урман» фильмы прокатка чыга

12 февральдән республика кинотеатрларында, герой-шагыйрь Муса Җәлилнең тууына 120 ел тулу уңаеннан, «Кара урман» фильмы күрсәтелә башлый. Проект 2024 елда Татарстан Рәисе Рөстәм Миңнеханов ярдәме белән төшерелгән.

– Муса Җәлил турында кино төшерү аеруча зур җаваплылык таләп итте. Безнең алда аның белән бәйле тарихны төрле милләт кешеләренә аңлаешлы булырлык итеп максималь рәвештә күрсәтү бурычы торды. Бәяләмәләргә караганда, без аны үтәдек дип ышанам, –дип белдерде фильм режиссёры Радик Кудояров журналистларга.

Кино төшерүдә туган авырлыкны да атап үтте. “Шагыйрьнең шигырьләре тәрҗемәләренең хокук ияләрен һәм аларның мирасчыларын эзләп карадык, әмма таба алмадык. Шуннан без аларны үзебез тәрҗемә иттек”, – диде ул. Тинчурин театры актеры Зөлфәт Закировның Муса Җәлил ролен башкару хыялы күптән булган. Һәм аңа бу тәкъдим бер дә көтелмәгәндә килеп ирешкән. Югыйсә аңа фильмда башка роль – Гайнан Кормаш роле тәгаенләнгән була.

– Муса Җәлил ролен башкару театр училищесында укыганда ук барлыкка килгән иде. Мин дә герой-шагыйрь туган көнне дөньяга килгәнмен. Илһам абый Шакиров та шушы көнне туган. Сәхнәдә яки фильмда алар булып уйнау теләге чынлап та булды. Театрда бу хыялым чынга ашмаса да, кинода ул мине эзләп тапты. Кино төшерер алдыннан Радик Кудояров белән очрашканнан соң бер-ике көн үтүгә, ул миңа Җәлил ролен башкарырга тәкъдим итте. Мин секунд та уйламыйча, ризалаштым, – дип искә алды ул кинога төшү тарихын.