Муса Җәлилнең рәссам булуын белә идегезме?

Моның өчен бары тик безгә татарча сөйләгез, дип кенә әйтергә кирәк.

– Музейларда татар теленә игътибар көчәя бара, – ди республиканың Милли музее генераль директоры Айрат Фәйзрахманов журналистлар белән очрашу барышында. – Гомумән алганда, музейларда узган чараларның уннан бер өлеше татар телендә уза. Музейларга гадәттә читтән килгән туристлар килә. Татар телендә узучы чаралар күләмен тагын да арттырырга телибез.

Музейларга йөрергә яратучы һәм булган чараларда актив катнашучы мәктәпләр дә шактый икән. Шул ук вакытта белем учакларының үзләрендә дә музейлар эшләп килә. Балалар үз проектларын яклап, татар дөньясы, шәхесләре белән күбрәк белә алалар. Дәүләт музейлары мәктәпләрдә эшләп килүче музейларга ярдәм итү юнәлешендә дә эш алып бара.

– Мәктәпләрдә бик көчле музейлар бар, – ди Айрат Фәйзрахманов. – Совет чорыннан бирле эшләп килүче бик көчле музейлар саклана. Балалар бер-берсенең эшен белү өчен кунакларга йөрешсеннәр, татар телле музейларны белеп үсеннәр иде.

Музейларга йөрүчеләр хәзер экспонатлар гына карап йөрмиләр, ә төрле мастер-классларда катнашалар. Мисалга, Муса Җәлилнең шагыйрь булуын күпләр белә. Ә менә аның рәсем ясарга яратуы яңалыктыр. Музейга килгән балаларны герой-шагыйрьнең иҗаты белән генә таныштырып калмыйча, әсәрләрен рәсемгә төшерү буенча да мастер-класслар уздыруны да гадәткә керткәннәр.

– Муса Җәлил ил күләмендә мәктәп дәреслегенә кертелгән бердәнбер татар язучысы, шуңа күрә аның иҗаты белән тагын да күбрәк кызыксынып килүчеләр шактый. Казан мәктәпләреннән тыш, Россиянең башка шәһәрләреннән дә киләләр. Музейда эшли башлагач, Казан урамнарының Муса Җәлилгә бәйле урыннары күп булуына үземнең дә исем китте, – диде Муса Җәлил музей-фатиры мөдире Ленария Мөслимова.

Билгеле булганча, Татарстанда «Гаилә» илкүләм проекты гамәлгә ашырыла.