Җырчы Илназ Минвәлиевның улы Алмаз яңа шөгыль тапкан: хәзер намазлыклар да бәйли

Егет үз куллары белән йомшак ковриклар бәйли, заказлар кабул итә. Инде чираттагы эшенә дә керешкән – намазлык бәйли башлаган.

Алмазның әнисе социаль челтәрдә улының уңышлары белән уртаклашкан. Ул Гөлназ Закирова өчен әзерләнгән коврикның тәмамлануын хәбәр иткән. Ә хәзер Алмаз, бисмилласын әйтеп, яңа эшкә тотынган.

«Рәхмәт сиңа, Алмаз улым, булганың өчен! Безнең өчен Аллаһ бүләге син», – дип яза әнисе, улына карата горурлыгын һәм җылы хисләрен белдереп.

Алмазның үзенә шундый матур һәм файдалы шөгыль табуы сөендерә. Кул эшенә осталыгы да, тырышлыгы да күренеп тора. Ә инде намазлык бәйләргә алынуы аеруча игътибарга лаек.

Яшь егеткә уңышлар, кулларына сихәт, күңеленә илһам телибез!