«Права»ны югалткач, яңадан имтихан бирергә кирәкме?

Укучыбыздан килгән сорауга адвокат Марат Гайнуллин җавап бирә: 

Әлеге очрак сезнең машина йөртү хокукыннан ни сәбәпле мәхрүм калуыгызга бәйле.

Әгәр сезне суд карары белән «права»дан мәхрүм итсәләр (хокук бозган өчен):

Мәсәлән, исерек хәлдә руль артына утыру яки медицина тикшерүеннән баш тарту очрагында.

 Бу очракта:

* мәхрүм итү срогы тәмамланырга тиеш;
* ЮХИДИда теоретик имтихан тапшырырга кирәк;
* барлык штрафларны түләргә;
* кирәк булса, медкомиссия узарга;
* аннан соң гына гариза биреп таныклыкны кире алырга мөмкин.

Имтихансыз «права»ны кире кайтарып булмый.

Әгәр таныклык гамәлдән чыгарылган булса: (мәсәлән, медицина күрсәтмәләре яки документлардагы хата аркасында)

 Бу очракта:

* сәбәбен бетерергә (медкомиссия узарга һ.б.);
* ЮХИДИга гариза белән мөрәҗәгать итәргә;
* кайбер очракта имтихан кирәк булмаска мөмкин.

Әгәр таныклык югалган яки срогы чыккан булса:

Бу очракта:

* ЮХИДИга мөрәҗәгать итәсез;
* гариза язасыз;
* кирәкле документларны тапшырасыз (срок чыккан булса – медбелешмә дә);
* имтихан тапшырырга кирәкми.

Имтихан бары тик суд карары белән хокуклардан мәхрүм ителгән очракта гына мәҗбүри. Калган очракларда гариза белән мөрәҗәгать итү җитә.
 

Билгеле булганча, «Яшәү өчен инфраструктура» илкүләм проекты гамәлгә ашырыла.