Романовлар рухы һәм заманча зиннәт

3 мартта Казан Кремле диварлары арасында MISS MRS Little MISS BRICS 2026 конкурсына багышланган матбугат конференциясе узды. Очрашу конкурсның мәдәни-мәгариф программасын тәкъдир итүгә һәм иң көтелгән мизгелгә — җиңүчеләргә тапшырылачак эксклюзив таҗларны күрсәтүгә багышланды.

1000 бриллиант һәм 194 карат

Җиңү символлары — Chamovskikh Jewellery House тарафыннан махсус әзерләнгән чын сәнгать әсәрләре. Ювелирлар илһамны Романовлар династиясе мирасы һәм матурлык алиһәсе Аугуста образыннан алган.

Таҗлар алтыннан коелган, премиаль сыйфатлы асылташлар һәм коллекцион энҗеләр белән бизәлгән. Гомуми алганда, бер таҗда 1637 асылташ кулланылган, аларның суммар авырлыгы — 194 карат. Төп таҗны бизәү өчен генә дә меңнән артык бриллиант файдаланылган.

— Бу — илләргә хөрмәт белдерүче һәм бердәмлекне символлаштыручы мәһабәт сәнгать әсәре. Без БРИКС илләре хатын-кызларының мәдәниятен, традицияләрен һәм эчке көчен чагылдырырга омтылдык, — дип ассызыклады ювелир йортының вице-президенты Юрий Толмачев.

Матурлык кына түгел, мәгънә дә

Матбугат очрашуында конкурсның вице-президенты Анна Вавилова, стилист һәм жюри әгъзасы Владислав Лисовец, җырчы һәм композитор, Россиянең атказанган артисты Марк Тишман катнашты. Залда шулай ук катнашучы илләрнең милли дирекция вәкилләре дә бар иде.

Владислав Лисовец, жюри әгъзасы буларак, бәяләү принципларын ачыклады:

— Хатын-кыз — ул яктылык чыганагы. Без тышкы кыяфәтне генә түгел, эчке энергияне, интеллектны, рухи тирәнлекне дә күрәчәкбез. Матурлык — ул образ гына түгел, дөньяга караш та.

Марк Тишман да бу фикерне дәвам итте:

— Бер генә критерий була алмый. Кеше катлаулы, һәм без һәр катнашучының ачылуын күзәтәчәкбез. Сәхнәдәге елмаю артында нинди шәхес торуын күрү — иң мөһиме.

Казан — мәдәни мәйдан

Катнашучыларны бай программа көтә. Алар Казан тарихы һәм мәдәнияте белән танышачак, Кремль буенча экскурсиядә булачак, милли ризыклар — чәк-чәк һәм өчпочмак пешерү серләренә төшенәчәк. Моннан тыш, вокал, визаж, ораторлык сәнгате, стиль һәм этикет дәресләре, спорт күнегүләре каралган.

6 март көнне конкурсантлар Республика балалар клиник хастаханәсенә барачак. Анда алар кечкенә пациентларга бүләкләр тапшырып, игелекле гамәл кылачак. Кич белән хәйрия аукционы узачак: җыелган акчалар Анна Вавилова фондына юнәлтеләчәк.

Йолдызлы финал

Конкурсның тантаналы ябылуы масштаблы шоу белән тәмамланачак. Сәхнәдә Дима Билан, Клава Кока, L'One, JONY һәм башка популяр артистлар чыгыш ясаячак. Кичәне Яна Чурикова белән Ксения Бородина алып барачак.

Чарада шулай ук Ксения Собчак, Ольга Бузова, Ханна, Нюша, Ольга Серябкина, Эльдар Джарахов һәм башка кунаклар катнашачак.

Халыкара бәя

Көньяк Африка Республикасы вәкиле Пумзиле Грейс Нтшабеле татар кунакчыллыгын аерым билгеләп үтте: аэропортта милли җыр-бию белән каршы алу аларда онытылмас тәэсир калдырган. Үзбәкстаннан Өметай Хәйдари конкурсны “чын мәгънәсендә халыкара дәрәҗәдәге мегапроект” дип атады. Казахстан жюри әгъзасы Гаухар Амеркулова исә бәяләүнең тулысынча ачык һәм гадел булуына игътибар итте: махсус IT-платформа һәр тавышны үтә күренмәле итәчәк.

MISS MRS Little MISS BRICS 2026 — матурлык бәйгесе генә түгел, ә мәдәниятләр диалогы, традицияләр очрашуы һәм хатын-кыз көченә мәдхия. 1637 асылташ белән бизәлгән таҗлар исә бу масштаблы проектның затлылыгын һәм амбициясен ачык чагылдыра.