Россиянең машина төзелеше үзәге – Татарстан

– Татарстан – илебезнең машина төзелеше үзәге. Республикада “КАМАЗ”, “СОЛЛЕРС”, “АУРУС”, “РариТЭК” кебек эре компанияләр эшли. 60 предприятие машина төзелеше өчен детальләр ясый. Татарстан югары дәрәҗәдә Универсиаданы, БРИКС саммитын, Казан форумны үткәрде. Республиканың халыкара чараларны оештыруда тәҗрибәсе зур. Автотранспортка кагылышлы форум да әһәмиятле чара, – диде республиканың  Премьер-министры урынбасары-сәнәгать һәм сәүдә министры Олег Коробченко “Татар-информ” мәгълүмат агентлыгында уздырылган матбугат конференциясендә.

“Комтранс” проекты җитәкчесе Роман Кузьмин таныштырганча, әлеге форум 2000 елдан башлап оештырыла.
– Беренче форумда 20 предприятие генә булса, хәзер катнашучылар саны 250гә җитте. Россия төбәкләреннән тыш, Төркия, Кытай һәм БДБ илләренең машина төзелеше компанияләре Казандагы форумга килергә теләкләрен белдерделәр инде. Форум тәҗрибә уртаклашу, хезмәттәшлек килешүләре төзү мәйданы да булып тора. Күрешеп-танышып, үзара хезмәттәшлек башлаган компанияләр шактый. Күргәзмәгә гадәти йөк машиналары, автобуслар, коммуналь техника гына түгел, ә пилотсыз автотранспорт та куелачак. Сатып алучыларга автотранспортны шунда ук йөртеп карау мөмкинлеге тудырыла. Бизнес вәкилләренең  машиналарны сатып алганда аларның нинди техник сыйфатларга ия булуын беләселәре килә бит, рәхим итеп өйрәнсеннәр, – диде Роман Кузьмин. 

Форумда хезмәт төренә караган киңәшмәләр дә оештырыла. Мәсәлән, автопарклар, автомобильләр сату белән шөгыльләнүчеләр, сервис, детальләр ясаучылар, коммуналь һәм төзелеш техникасы кулланучылар, коммерция транспортын идарә итүчеләр аерым җыелышалар.

“Казан Экспо” халыкара күргәзмәләр үзәге генераль директоры урынбасары Игорь Астафьев:”Татарстан Рәисе Рөстәм Миңнеханов икътисадка кагылышлы чараларда даими катнаша, күргәзмәләр оештыруга теләктәшлек күрсәтә. “Комтранс” форумында катнашачак вәкилләр өчен  Татарстандагы предприятиеләргә таныштыру экскурсияләре үткәрелсә, отышлы гамәл булыр иде, минемчә, – диде.

Россия Федерациясенең Сәнәгать һәм сәүдә министрлыгы теләктәшлегендәге “Комтранс” форумы Казанда тәүге мәртәбә узачак. Оештыручылар өметләнгәнчә, Казанда 2026 елның октябренә билгеләнгән форум Россиянең машина төзелеше һәм транспорт өлкәсендәге әһәмиятле вакыйга булачак.