Рөстәм Миңнеханов Арчада авыл халкын борчыган актуаль мәсьәләләр буенча фикер алышты

Искәртәбез, Рөстәм Миңнеханов бүген язгы кыр эшләренең барышы белән танышу өчен районнарны йөреп чыга. Ул барган беренче район - Әтнә. Шуннан соң Татарстан Рәисе һәм аны озата йөрүче затлар Арча муниципаль районына юл тоттылар.

Монда Рөстәм Миңнеханов кырлардагы оператив вәзгыять белән танышты, хуҗалыклар җитәкчеләре, инвесторлар, авыл җирлекләре башлыклары һәм Арча муниципаль районы активы белән очрашты.

Очрашуда авыл халкын борчыган актуаль мәсьәләләр буенча фикер алыштылар.

Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров: Арча районы чәчүгә актив кушылды, диде.

Татарстан Республикасы Авыл хуҗалыгы һәм азык – төлек министрлыгы башлыгы сүзләренә караганда, чәчү өчен минераль ашламалар һәм орлыклар җитәрлек. Ул шулай ук авыл хуҗалыгы техникасын яңарту кирәклеген дә искәртте.

Марат Җәббаров искәрткәнчә, Татарстанда авыл хуҗалыгы җитештерүчеләренә федераль һәм республика ярдәменең хуҗалыклар җитәкчеләре файдалана алырлык барлык чаралары да эшли. Шәхси ярдәмче хуҗалыкларга килгәндә, министр ассызыклаганча, бу мәсьәләдә эшне көчәйтергә кирәк – бигрәк тә терлекләр санын арттыру өлкәсендә.

Арча муниципаль районы башкарма комитеты җитәкчесе Алмаз Хисаметдинов районда хәлләрнең барышы турында сөйләде. Районның авыл хуҗалыгы җитештерүчеләре продукциясе күргәзмәсе оештырылган иде – орлыклар, игенчелек продукциясе, яшелчәләрнең кайбер сортлары һәм башкалар тәкъдим ителде.

Рөстәм Миңнеханов хуҗалыклар җитәкчеләре һәм район активы белән әңгәмә барышында республикада барлык республика программалары буенча эш дәвам ителәчәгенә игътибар итте. Аерым алганда, ул билгеләп үткәнчә, планлаштырылган юл эшләрен вакытында оештырырга кирәк.

Татарстан Рәисе 1941-1945 еллардагы Бөек Ватан сугышында Җиңүнең 80 еллыгын бәйрәм итүгә аерым тукталды. Ул Арча районы активы вәкилләренә ветераннарга һәм аларга тиңләштерелгән кешеләргә зур игътибар бирергә кушты. Рөстәм Миңнеханов шулай ук махсус хәрби операциядә катнашучыларның гаиләләренә ярдәм күрсәтергә кушты.

Аннары Рөстәм Миңнеханов Ия елгасы яры буйлап Габдулла Тукай музееннан Сәгъди йортына кадәр «Тукай эзләре буенча» туристик маршрут объектларын карады. Аңа Тукай музей комплексында төзекләндерелгән яр буен күрсәттеләр. Елга яры буйлап барлык маршрут озынлыгы 3 км тәшкил итә.

Арча районында Рөстәм Миңнеханов татар шагыйре Габдулла Тукай һәйкәленә чәчәкләр салды.

Бүген Татарстан Рәисе шулай ук Балтач муниципаль районында да булачак.

ТР Рәисе Матбугат хезмәте