Рөстәм Миңнеханов балтачлыларга яхшы хезмәтләре өчен рәхмәт белдерде

Район башлыгы Рамил Нотфуллин һәм вице – премьер - Татарстан Республикасы авыл хуҗалыгы һәм азык-төлек министры Марат Җәббаров белән бергә алар вертолеттан район кырларын карап чыктылар, республика Рәисенә чәчү эшләренең барышы турында сөйләделәр.

Килүгә үк Татарстан Рәисе хуҗалыклар җитәкчеләре, инвесторлар һәм җирлек башлыклары белән очрашты. Бүгенгә язгы чәчү 21,6 мең га (50%) мәйданда башкарылган. Бөртекле һәм кузаклы культуралар буенча чәчү 76%ка үтәлгән, тагын 5,2 мең га чәчеләсе калган. Быелгы уңыш өчен 5273 тонна ашлама тупланган - 1 гектарга 81 кг гамәлдәге матдә.

Соңгы 5 елда 9,6 мең баш савым сыерына исәпләнгән 11 сөтчелек комплексы файдалануга тапшырылган. Бүген терлекчелек комплексының тагын 4 объектын төзү дәвам итә. Районда барлыгы 59,6 мең баштан артык мөгезле эре терлек исәпләнә, шул исәптән 21 мең 335 баш сыер. Рамил Нотфуллин билгеләп үткәнчә, район тәүлеккә 420 тонна сөт савып ала, планда - 500 тоннага җиткерү.

Татарстан Республикасы авыл хуҗалыгы һәм азык-төлек министры районга тармак буенча югары бәя бирде. Шул ук вакытта ул шәхси ярдәмче хуҗалыкларны арттыру буенча эшне активлаштырырга өндәде. Бүген шәхси ярдәмче хуҗалыкларда 15,3 мең баш мөгезле эре терлек бар, шулардан - 6 мең 539 сыер.

Марат Җәббаров шулай ук сөт җыю буенча иң зур кооперативның нәкъ менә Балтач районында урнашуына игътибар итте.

Рөстәм Миңнеханов авыл хуҗалыгы хезмәтчәннәренә яхшы хезмәтләре өчен рәхмәт белдерде, район һәрвакытта да барлык юнәлешләр буенча лаеклы күрсәткечләр күрсәтә, дип ассызыклады. Татарстан Рәисе шулай ук җитәкчеләрне Бөек Ватан сугышында Җиңүнең 80 еллыгына багышланган барлык чараларны да лаеклы оештырырга өндәде.

Аннары Рөстәм Миңнеханов 1600 савым сыерына исәпләнгән сөт комплексын һәм «Татарстан" АХП " ҖЧҖнең терлек азыгы үзәген карап чыкты. Комплекста 185 кеше эшли. Узган ел йомгаклары буенча комплекс 17,1 мең тонна сөт һәм 787,2 тонна ит җитештергән.

ТР Рәисе Матбугат хезмәте