Шәһәр көнен берничә көн алдан башлыйбыз: Казанда кая барырга була?

«Һава торышы өчен генә бераз борчылабыз»

«Казан тавышлары» перформансы быел алтынчы тапкыр уза. Елдагыча Казан мэриясе фасадында видео, ут һәм иҗатны берләштерүче перформанс күрсәтеләчәк. Быел чарада 60 еллардан алып 5 чорны күрсәтеләчәк. Барысы да тере тавышка, оркестрга кушылып башкарылачак. барлык җырларны тере тавышка оркестрга кушылып башкарачак. Казан шәһәре вице-мэры Гүзәл Сәгыйтова сүзләренчә, «Казан тавышлары» — шәһәр брендына әйләнде.

— Җәй айлары Мэрия өчен бик кызу булды. Атна саен диярлек Казанда чаралар узды. Һава торышы өчен генә бераз борчылабыз. Өстән яңгыр явып торса, кыен була. Салкын, җил булса да, кеше барыбер җыела әле. Халык күп булу сөендерә, әлбәттә, әмма тамашачылар белән бергә тәнкыйтьтә күбрәк. Агачлар комачауламасын өчен бераз күчтек инде. Әмма агачларны кисеп булмый. Яңа урынга күчү дә мөмкин түгел, — ди Гүзәл Сәгыйтова.

Мэрия фасадында мәхәббәт тарихы

«Казан тавышлары» шигъри-музыкаль перформансы нигезендә быел мәхәббәт тарихын ачачак. "Ике балкон арасында бушлык. Аларны бер-берсеннән бары 10 метр гына аера. Әмма шул араны алар 50 ел үтә алмыйлар. Шушы тарих перформансның нигезе. Без берничә тарихи чорны күрсәтәчәкбез. Шигърият тә, җырлар да һәр тарихи чорны ачыклап киләчәк, — дип сөйләде перформанс режиссеры Резидә Гарипова.

• "Казан тавышлары«нда Г. Камал. К. Тинчурин, ТЮЗ, Качалов театры актерлары һәм җырчылар катнаша. Илгиз Мөхетдинов сүзләренчә, әлеге проект — очрашу урыны.

— Иҗатчылар, гадәттә, һәркем үз бинасында эшли. Шуңа күрә бу чара иҗатчыларны да берләштерә. Сәхнәдә чыгыш ясаганда утлар яктылыгында күпвакытта зал күренми. Ә бу перформанста сине меңләгән күз күзәтүен аңлыйсың. Җыр аша аралашасың, — ди ул.

«Казан тавышлары» перформансын үткәрү сәбәпле 26-27 август Кремлевская урамында транспорт хәрәкәте өчен чикләүләр булачак.

Иң оста биючегә 150 мең сум!

«Хәрәкәттә-бәрәкәт» проекты кысаларында быел да «Бию көрәше» үткәрелә. Җәй дәвамында бию остаханәләрендә катнашучылар арасында бию көрәше үткәрелде. Иң яхшы биючеләр исә, финалга «юллама» отты. Быел һәвәскәр биючеләр белән беррәттән профессионаллар да көч сынашачык. Төп бүләк — 150 мең сум. "Бию көрәше«ндә кайвакыт осталык түгел, ә энергия, эмоцияләр өстен чыга. Быел да төп җиңүчене тамашачылар сайлаячак.

Киләсе ел «Бию көрәше» бары профессиональ биючеләр арасында гына оештырылачак дип планлаштырыла. Бу профессиональ биюнең абруен күтәрү, бию сәнгатен әйдәп баручыларны барлау белән аңлатыла. «Хәрәкәттә-бәрәкәт» кысаларында һәвәскәрләр арасында бию батллары дәвам итәчәк. Искәртеп үтәбез, «Казан тавышлары» 27 август, ә «Бию көрәше» 28 август узачак. Керү ирекле.