Сайлауларда волонтерлар ярдәм күрсәтәчәк

Быелның 18, 19 һәм 20 сентябрьләрендә Россия Дәүләт Думасына депутатлар, Татарстан Республикасы Дәүләт Советына Биектау бермандатлы сайлау округы буенча өстәмә депутат сайлау була.

Сайлаучылар 3 миллионнан артык

Татарстанның Үзәк сайлау комиссиясендә республиканың шәһәрләрендәге һәм районнарындагы волонтерлар өчен видеолекция үткәрелде.

— Тавыш бирү көннәрендә сайлау участокларында 500 волонтер ярдәмчеләр сыйфатында катнашачак. Алар арасында яшьләр дә һәм «көмеш яшьтәгеләр», ягъни, өлкәннәр дә бар. Республикада 3 миллионнан артык сайлаучы исәпләнә, — диде Татарстанның Үзәк сайлау комиссиясе рәисе Андрей Кондратьев.

Казан дәүләт медицина университеты студентлары сайлаулар көннәрендә медик-волонтерлар булып эшләячәк.

— Россия Дәүләт Думасына — төп парламентка депутатлар сайлау бик мөһим вакыйга. Безнең студентлар медицина учреждениеләрендәге авыруларга тавыш бирүдә ярдәм итәчәк. Студентларның күбесе үзләре дә сайлауларда беренче мәртәбә тавыш бирә. Үзеңнең тавышыңны бирү — илнең тотрыклы үсешен, иминлеген кайгырту ул. Студентлар сынатмаслар дип ышанам, — диде Казан дәүләт медицина университеты ректоры Айрат Фәррахов.

18 яшьтән волонтер

Татарстанның 14 шәһәрендә һәм районында сайлау участокларында волонтерлар да була.

— Сайлау көннәрендә волонтер ролен башкару өчен 18 яшь тулу һәм Россия Федерациясе гражданы булу шарт. Күзәтүче, депутатлыкка кандидат ышанычлысы, комиссия әгъзасы беррәтән волонтер булып та катнаша алмый. Начар күрүче кеше бу халәтен сайлау участогы комиссиясенә әйтә, мондый очрак күзәтүчеләргә җиткерелә һәм шуннан соң, аның өчен озатучысы яки волонтер бюллетеньгә тамга сала, — дип әйтеп үтте республиканың Электораль волонтер мәктәбе җитәкчесе Динара Чепигина. 

Казан дәүләт медицина университеты профессоры Сергей Булатов медик-волонтерларга сайлау участокларында хәле начарланып киткән кешеләргә ашыгыч медицина ярдәме күрсәтү алымнарын кабат искә төшерде.

• «Игелекле Татарстан» волонтерлык мәгълүмат ресурс үзәге җитәкчесе урынбасары Гүзәл Ганиева волонтерларны сәламәтлекләре чикле кешеләр белән итәгатьле генә сөйләшергә киңәш бирде. Физик мөмкинлеге чикле яки авырып киткән кеше сайлау участогы комиссиясе әгъзаларын өйгә чактырта ала.