Сак бул! Язгы ташкыннар матур, ләкин куркыныч кодрәт

Апрельнең беренче декадасында һава җылыначак һәм кар тизрәк эри башлаячак, дип фаразлый синоптиклар. Татарстан Республикасының гадәттән тыш хәлләр комиссиясенең 18 мартта узган чираттагы утырышында язгы су басуларга каршы әзерлек мәсьәләләре каралды.

Басканны көтеп утырмаска

– Кар климат күрсәткечләреннән күбрәк яуганлыктан, су басулар ихтималы зур. Узган еллардагы язгы хәлләдән ачыкланганча, гидротехник корылмаларда җитешсезлекләр бар. Елгаларның агым юлларын чистарту, ярларны ныгыту, елга төпләрен тирәнәйтү эшләрен башкару зарур. Язгы ташкыннар көчәеп киткән очракта, республикада 39 муниципаль берәмлектә 218 торак пункт су баскан территорияләрдә калырга мөмкин. Боларда 5 700 торак йорт урнашкан, аларда 13 409 кеше яши. Шулай ук 9 социаль әһәмияттәге бинага, автомобиль юлларының 55 участогына, 28 күпергә су басу яный. Су басу ихтималы күзәтелсә, югары әзерлек режимы кертергә, ә инде су баса башласа, кичекмәстән гадәттән тыш хәл режимына күчәргә кирәк, – дип искәртте Татарстан Премьер-министрының беренче урынбасары Рөстәм Нигъмәтуллин. Ул су басканны көтеп утырмаска, әзерлек чаралары күрергә чакырды.

 Мартта түгел – апрельдә

Татарстанның Гидрометеорология һәм тирә-юнь мохиткә мониторинг идарәсе җитәкчесе Сергей Захаров:
“Кайбер мәгълүмат чаралары “мартның соңгы декадасында аномаль җылылык башлана”, дип хәбәр таратты. Бу дөрес түгел, җылыту апрельнең беренче декадасыннан башланачак, дип фаразлана”, – диде.

Сергей Захаров сүзләренә караганда, туфракта – туң, ә елгаларда боз калынлыгы зур түгел. Казанда, Лаешта һәм Питрәчтә кар аеруча калын яткан. Күбнә, Берсут, Кече Чирмешән елгаларындагы язгы ташу сулары ярларыннан чыгарга мөмкин.

– Муниципаль берәмлекләрдә су басулар күзәтелгән үзәнлекләрдә йорт салу өчен җир кишәрлекләре бүлеп бирәләр. Мондый гамәлләргә юл куелмасын иде, – диде Сергей Захаров.

 Йортны иминиятләштерү хәерле

Татарстанның гражданнар оборонасы эшләре буенча һәм гадәттән тыш хәлләр министры урынбасары Николай Суржко чыгышында әйтелгәнчә, республикада 2026 елның язгы су басуларына каршы 513 миллион 339 мең 427 сумлык хәстәрлек чаралары күрелгән.

– Республикадагы 7 муниципаль берәмлектә елгаларның боз тыгылырга мөмкин урыннарында боз кискәләнелә. Моннан тыш, 8 район әле бозларны шартлатырга да заявка бирде. Татарстан Рәисе Рөстәм Миңнеханов теләктәшлегендә гидротехник корылмаларга капиталь ремонт үткәрелә. 32 гидротехник корылманың хуҗасы юк, 64 күпер төзекләндерүгә мохтаҗ. Су басулар очракларына йорт һәм корылмаларны иминиятләштереп кую хәерле, – диде Николай Суржко.

 Өлкәннәргә ярдәм итегез!

Казан шәһәре Башкарма комитеты җитәкчесе Рөстәм Гафаров видеоэлемтә аша хәбәргә чыгып, башкалада су басуларга каршы планлы чаралар күрелүен әйтте.

Татарстанның экология һәм табигый чыганаклар министры урынбасары Алмаз Тугушев мәгълүмат биргәнчә, Югары Осландагы станциядә Балтыйк үлчәү системасы буенча Куйбышев су саклагычындагы су биеклеге бүгеннәрдә 51 метрны тәшкил итә. Су биеклеге 54 метр 24 сантиметрдан артса, территорияләрне су басу яный.

“Йорт түбәләреннән кар төшерү, кар-яңгыр сулары ага торган торбаларны чистарту эшләре башкарыла”, – диде Татарстанның төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин.

“Мәсьәләгә җаваплы караш булсын. Өлкәннәргә, социаль яклауга мохтаҗ гаиләләргә йортлары янында канаулар казуда булышлык күрсәтергә кирәк”, – дип, утырышка йомгак ясады Рөстәм Нигъмәтуллин.



Билгеле булганча, «Экологик иминлек» илкүләм проекты гамәлгә ашырыла.