Сочи кирәк түгел, Төркия арзан

Белгечләр әйтүенчә, анда барырга теләүчеләрнең саны якынча 10 процентка азрак. Әмма бу хәл бездә генә түгел. Россия буенча җәйге сәяхәтләргә ихтыяҗ берничә ел эчендә беренче тапкыр кими.

2025 ел белән чагыштырганда, җәйге сезонда Россия буенча турларга ихтыяҗ 4,8 процентка кимрәк. Рубльнең ныгуы аркасында, чит илгә сәфәрләр отышлырак була башлады.

Россия туризм индустриясе берлеге мәгълүматларына караганда, агымдагы җәйгә Краснодар краена, Мәскәүгә, Санкт-Петербургка, Кырымга, Ставрополь краена, Мәскәү өлкәсенә, Татарстанга, Калининград өлкәсенә, Приморье краена һәм Ярославль өлкәсенә ихтыяҗ зур. Шул ук вакытта әлеге ун төбәк арасында, 2025 ел белән чагыштырганда, бары тик икесе генә популярлыгын саклый.

Бу – Краснодар крае һәм Кырым. "Башка барлык төбәкләр дә бу унлыкта, кызганычка каршы, үсешнең тискәре күрсәткечләрен күрсәтәләр. Мәскәү 8,4 процент югалта, Санкт-Петербург узган елгы күрсәткечләргә карата – 6,5 процент, Ставрополь крае – 15,2 процент, Мәскәү өлкәсе – 4,2, Татарстан – 9,3, Калининград өлкәсе 15 процентка кими, Приморье крае – 3,1, Ярославль өлкәсе – 9,1 процентка", – дип белдергән Россия туриндустрия берлеге президенты Илья Уманский. Шулай ук, аның сүзләренчә, һава торышы аномалияләре аркасында быел топ унлыктан Дагыстан төшеп калган.

Ә менә чит илгә турлар сату, киресенчә, 12 процентка арткан, дип хәбәр иткән “ТАСС”ка Россиянең туристлык агентлыклары альянсы вице-президенты Алексан Мкртчян. "Чит ил буенча без плюс 12 процент. Әйтик, май аенда Сочида иртәнге аш белән биш йолдыз кунакханәдә ике кешелек номер 15 мең сум торса, Батумида шул ук шартларда ял 7 мең сум, ягъни ике тапкырга арзанрак. Мисырда “бөтенесе дә кергән” системасы буенча биш йолдыз кунакханә 15 мең сум", – дигән ул.

Абхазиягә бәяләр Сочига караганда 25 процентка түбәнрәк. Сумның ныгуыннан тыш, бәядәге аермага Россия кунакханә хуҗаларының бәяләрне 10-15 процентка кадәр күтәрүләре дә йогынты ясый. Россиялеләр арасында иң популяр биш илгә Төркия, Мисыр, Кытай, Таиланд һәм Вьетнам керә.