Суга агып киткән әрәм гомерләр

Республикада коену чоры 1 июльдән 31 августка кадәр дәвам итте. Ләкин, кайбер кешеләрнең һаман да сулыкларда коенуы очраклары күзәтелә икән.

Уеннан уймак чыгарма

— Көн җылы һәм кояшлы булса да, сулыкларда су инде салкын, шунлыктан, су коену салкын тидерү яки тагын да фаҗигалерәк тәмамланырга ихтимал, — дип кисәтте Татарстанның кече күләмле көймәләр буенча баш дәүләт инспекторы Денис Мокеев «Татар-информ» мәгълүмат агентлыгында үткәрелгән матбугат конференциясендә.

Татарстанда коену чорында, ягъни, 1 июльдән 31 августка кадәр арада сулыкларда 42 кеше батып үлгән, шуның алтысы — балалар.

— Республикада 55 пляж эшләде. Кисәтүләргә карамастан, кайбер кешеләр рөхсәт ителмәгән, тикшерү уздырылмаган урыннарда коена. Нәтиҗәсе аяныч — 29 кеше рөхсәтсез урыннарда су коенганда батып үлде, — диде Денис Мокеев.
Сулыкларда иминлек таләпләрен бозган өчен 69 кеше административ штрафка тартылган. Штраф 1,5 мең сумнан башлана.

Көймәләргә таләп катгый

• Көймәләр белән бәйле 13 һәлакәт теркәлгән, шуларда 8 кеше суга баткан. Көзге җилләр дулкыннар чыгара, су салкын, көн яктылыгы кыска. Көймәләрдә ерак китмәскә, кая барачагыңны гаиләгә яки күршеләргә әйтеп куярга кирәк. Коткару жилеты киелгән булсын, үзең белән телефон, фонарь алу зарур. Кече көймәләрдә күперләр астында, елга суднолары юлында туктап торырга ярамый. Ватык көймәдә сулыкларга чыгу тыела.

Якын килмә яр буена

Сулыкларда батып үлүчеләрдән 21 кеше өс киемнәреннән булган. Өлкән яшьтәгеләрнең, авырып киткән кешеләрнең текә ярларга артык якын килмәүләре сорала. 

— Егылып төшүдән һәм киемнәр авырлыгыннан кеше судан ярга чыга алмаска мөмкин. Ата-аналар кечкенә балаларына игътибарлы булсыннар, үзләрен генә сулыкларга җибәрмәсеннәр. Укытучылар, тәрбиячеләр дә балаларга сулыкларда шаярырга ярамаганлыгын искәртеп торсыннар иде. Безнең инспекторлар мәктәпләрдә үзләре дә чыгышлар ясый. Суга батып, кешеләр гомере заяга әрәм булмасын, — дип тәмамлады сүзен Денис Мокеев.