Татар кызлары, нишлисез сез, кайсы җирегез белән уйлыйсыз!? - дип чаң сугасы килә

Тулаем алганда, бер тиенгә яраксыз, сөекле татар халкыбыз өчен зыянлы мәкалә. Әле анда да гүзәл затларыбыз булган милләтәшләребезгә чит өммәттәге ир-егетләргә беркайчан да кызыгырга, ә гомумән алганда һичкайчан гашыйк булырга ярамаганлыгын ассызыклап һәм дәлилләп язганда гына, гыйбрәт өчен дип бастырырга мөмкин булыр иде, аның ише мәкаләләрне!

Хәтердә, бервакыт “Шәһри Казан” кебек үк олпат басмада ниндидер татар кызының кытайлыгамы, вьетнамлыгамы инде кияүгә чыгуы хакында тәфсилләп, бака ашаганнары турында ук язылган мәкаләне нәфрәт тойгысы кичереп укыган идем. Анда да язма авторы татар хатын-кызы иде. Хәтерем ялгышмаса, ул мәкаләдә дә монголоид токымын үрчетергә гомерен фида итүче татар кызының бәхетле булуы “исбатланган” иде.

Үзебезнең милләттән булмаган бәндәләр белән киләчәк тормышыгызны бәйләргә омтылучы татар кызлары, нишлисез сез, кайсы җирегез белән уйлыйсыз!? - дип чаң сугасы, кычкырасы-акырасы гына түгел, тәгәрәп елыйсы килә. Чит милләт кешесенә чыгып, “бәхетле” булырга хыялланган татар кызларына бөек Гаяз Исхакыебызның “Зөләйха”сы язмышы белән кабат танышып чыгу комачауламас иде.

Хезмәт вазыйфам буенча, бер районның татар авылында командировкада булган яшь чагымда, фильмнарда гына тасвирланырлык искиткеч сылу татар хатынының (КДУның татар факультын тәмамлаган үзе) урамда бала-чагалар арасында уйнаган улын әрмән телендә эндәшеп чакыруын ишеткәч, исем-акылым киткән иде (күп авыллар әрмән шабашниклары белән тулган узган гасырның 80-90 нчы еллары). Ул чорда байтак татар кызларыбыз татар егетләренә караганда, хатыннары-балаларын вакытлыча ватаннарында калдырып Татарстанга килгән әрмәннәрне үз итте...