Татарның аш-сулары да кунаклар дәшә

Татарстан башкаласында 2025 ел башыннан 2,3 миллион турист булып киткән инде. Узган елны 4,5 миллион саны белән йомгаклаганбыз.

Казанның туристлыкны үстерү комитеты җитәкчесе Дарья Санникова әйтүенчә, шәһәребезгә турист сыйфатында сәфәр кылучыларның 73,6 проценты Россия төбәкләреннән. Төркия, Кытай, Һиндстан, Иран һәм Белоруссиядән дә күпләп киләләр. Иң популяр урын – Казан Кремле. Туристлар Казан белән генә чикләнмичә, Чаллы һәм Түбән Кама шәһәрләре, Питрәч һәм Лаеш районнары белән дә актив таныша.

– Россия төбәкләреннән Казанга елына 2-3 мәртәбә килүчеләр, узган ел белән чагыштырганда, 8 процентка артты, – ди Дарья Санникова.

Казанда җәмәгатьчелек мохитләрендәге җәйге мәдәни-спорт программасы татарстанлылар һәм туристлар өчен бик мавыктыргыч. Мәсәлән, “Тәмле Казан” һәм “Россия тәмнәре” фестивале тамашачыларны елдан-ел күбрәк җыя. Туристлар татар халкының милли ризыкларыннан чәк-чәк, өчпочмак, кыстыбый, бәлеш, каклаган казны ярата. Озак сакланганлыктан, кунаклар чәк-чәкне күчтәнәч итеп үзләре белән алып китә. “Тәмле Казан” фестивалендә татар халык аш-суларын әзерләү буенча “Осталык дәресе” дә көне буена барды. Россия төбәкләре һәм чит илләр кешеләренә татар ашларының “серен” һич яшермичә сөйләдек. “Кайткач, пешереп карыйбыз”, – диделәр.  Казанда төрле милләт вәкилләре дус-тату яши. Татарстан Рәисе Рөстәм Миңнеханов республикада милләтара һәм динара дуслыкка зур әһәмият бирә. Фестивальдә татарлар белән бергә күрше-тирә милли республикалар һәм БДБ илләре халыклары да үзләренең аш-суларын тәкъдим итте, милли җырлар-биюләр башкарды. Татарстанда шулай матур итеп яшәвебез үзебез өчен дә рәхәт, туристларны да җәлеп итә.

Илдус Хәкимов, аш-су остасы.