Татарстан җиле лампочканы кабыза алмый

– “Энергосәнәгать-2026” форумының төп максатлары – халыкара, аеруча БДБ һәм Азия илләре белән хезмәттәшлекне киңәйтү, цифрлаштыруга һәм чит ил товарларына алмаш булдыру, студентларны тармак белгечлекләренә әзерләү, – диде Татарстан Рәисе Рөстәм Миңнеханов форумның оештыру комитеты утырышында.

“Татар-информ” мәгълүмат агентлыгында үткәрелгән матбугат конференциясенә видеоэлемтәгә чыккан Россиянең энергетика министры урынбасары Эдуард Шереметцев:”Форумда Россиянең энергетика министры Сергей Цивилев, Татарстан Рәисе Рөстәм Миңнеханов катнашачак. Россиянең энергетика мөмкинлекләрен күрсәтәбез, уртак файдага һәм үзара хөрмәткә нигезләнелгән хезмәттәшлек тәкъдим итәбез, проблемаларны чишү юлларын барлыйбыз”, – диде.

Форумда Кытай, Һиндстан, Белоруссия, Таҗикстан, Кыргызстан, Үзбәкстан илләренең, Россиянең 40 төбәге предприятиеләренең катнашуы көтелә.

– Ираннан да килергә тиешләр иде. Тегеранда әле энергетика форумы да планлаштырылган иде, ул май аена күчерелде. Андагы сугыш хәрәкәтләре тизрәк туктасын, дип телибез. Сугыш түгел, ә сәнәгать беренче планда торырга тиеш. Бөтен дөньяда энергия кытлыгы күзәтелә, Россиянең энергия җитештерү мөмкинлекләре бик зур. Быелдан башлап Казан халыкара энергетика форумы федераль дәрәҗәдә уза. 1920 елларда тиңдәшсз ГОЭЛРО планы гамәлгә ашырылган. Бүген дә без куәтле энергетикалы һәм көндәшлеккә сәләтле ил булырга тиеш. Татарстанда җил агымнары көчле түгел, шулай да җилне файдалану мәсьәләсе өйрәнелә. Мәсәлән, Буа районында җил куәте тикшерелә, – диде Татарстан Премьер-министры урынбасары-сәнәгать һәм сәүдә министры Олег Коробченко.

Форум кысаларында энергетика күргәзмәсе дә эшли. Мәктәпләрдә 16-31 мартларда “Рус инженерлык мәктәбе” тематик дәресләр үткәреләчәк.

– Россиянең 20 төбәге, шулай ук Татарстанның “Татэнего”, “Татнефть” һәм башка предприятиеләре күргәзмәдә үзләренең мөмкинлекләрен күрсәтә. Форумның өченче көне яшьләргә багышлана,– диде “Татарстан Республикасы сәнәгатен үстерү фонды” акционерлык җәмгыятенең генераль директоры Марат Бохараев.

Төп фото архивтан