Татарстанда чикләре билгесез җирне сатып булмый: яңа кагыйдәләр үз көченә керде

Яңа канун урман фонды җирләре чикләрендә, авыл хуҗалыгы һәм гомум кулланыштагы җирләрдә, мәдәни мирас территорияләрендә, казылмалардан файдалану җирләрендә эшләр башкаруга, шулай ук җир кишәрлекләре тапшыруга аңлатмалар бирә.

– Россия Президенты Владимир Путин күрсәтмәсе нигезендә күчемсез милек чикләрен билгеләү эшләре дәвам итә. Җир кишәрлекләренең кадастр бәясе тәгаенләнә, – диде Татарстанның җир һәм мөлкәти мөнәсәбәтләр министры Фәнил Әһлиуллин Хөкүмәт йортында үткәрелгән брифингта.

Гражданнарга җир кишәрлеген файдалануга 2026 елның 1 мартына кадәр бирелгән рөхсәт документлары үз көчендә кала. Бизнес вәкилләре дәүләт яки муниципаль карамактагы җирләрдән җир кишәрлеген нинди максатларда алган булсалар, шул юнәлешне сакларга тиешлеләр. Бакчачылык яки яшелчәчелек ширкатләре дә эшчәнлек төрен үзгәртә алмый. Ләкин, бакчачылар гомум җыелышта “торак милекчеләре ширкате” оештырып, бакчачылык яки яшелчәчелек юнәлешендәге эшчәнлек төреннән баш тарта ала.

Татарстанда 2026 елда 160 кадастр кварталында чикләр билгеләнәчәк. Дәүләт теркәвенә 34 мең объектны кую ниятләнелә. Эшләр федераль һәм республика бюджетлары хисабына “Пространство мәгълүматларының илкүләм системасы” дәүләт программасы кысаларында гамәлгә ашырыла. Республикада 2022 елдан бирле 404 кадастр кварталында 185,2 мең күчемсез милекнең чикләре тәгаенләнгән.

– Узган елның мартыннан башлап күчемсез милек белән эшләр башкарганда аның чикләре билгеләнелгән булуы мәҗбүри таләп итеп куелды. Хәзер чикләре билгеләнелмәгән һәм ЕГРНга кертелмәгән җир кишәрлеген сатып, бүләк итеп яки алмаштырып булмый, – дип искәртте Росреестрның Татарстан буенча идарәсе җитәкчесе урынбасары Нияз Галиәкбаров.

Билгеле булганча, «Яшәү өчен инфраструктура» илкүләм проекты гамәлгә ашырыла.