Урамнарда – каһарманнар исеме, йөрәкләрдә – аларның батырлыгы

Бөек Ватан сугыш тәмамлануга инде ничә еллар. Әле дә булса сугыш кырында батырларча сугышкан каһарманнарның батырлыклары архив битләреннән калкып чыга. Ил азатлыгы өчен көрәшкән батырлар җыр булып тирә-юньгә тарала. 

Ә бит үз язмышларын куркыныч астына куеп күпме кеше сугышка чыгып китә. Бик азы гына әйләнеп кайта. 1941 елда ил сагына киткән кешеләрнең исемнәре тарихи чыганакларга уелып язылган. Беренче көннән китүчеләрне дә, җиңү белән кайтып кергән кешеләрнең дә олылап исемлеген алып барганнар. Менә ул халыкның аларга булган хөрмәте. Һәр авылда диярлек батыр авылдашлары хөрмәтенә урам исемнәре, зур шәһәрләрдә каһарманнар хөрмәтенә урамнар, проспектлар барлыкка килгән. Урам саен язмыш, йорт саен әллә ничә батыр. Броньнары була торып та, ил азатлыгы өчен яуга чыгып киткән кешеләр исән-сау туган җирләренә әйләнеп кайтып, илне кабаттан аякка бастыру өчен үзен аямыйча эшләгән. Очрашуларда яшь буынга башларыннан узган котычкыч фаҗигаләрне сөйләп, туган ил хакына яшәргә кирәген сеңдереп үстергәннәр. Бөек Ватан сугышы геройларының рәсемнәре йорт диварларына урнаштырыла башлагач, аларга карап горурланучылар, аларның язмышлары белән кызыксыну арта. Мәктәптә укыган балалар, сугышчылар хөрмәтенә аталган урам исемнәренең тарихы белән кызыксыну арткан. 

Ватанпарвәр уллар, шөкер, әле дә туып тора. Казан йортлары диварларында махсус хәрби операциядә катнашып батырлык күрсәткән геройларның рәсемнәре шактый. Аларның сурәте үзләре яшәгән йортларга урнаштырылган. Яшь егетләрнең үзләрен аямыйча ил сагына китүе үзе зур батырлык. Ил горурлыгы булган бу егетләрнең ихластан елмаеп торган карашы ватанпәрвәрлек рухын чагылдыра. Үсеп килүче яшь буын алар белән кызыксына, батырлыкларын кабатларга теләп, ил сагына китә, Ватан алдында торган ир-егетнең изге бурычын үтәүне үзенә максат итеп куя. Россия – үзенең батыр уллары белән көчле.