“Яу кырында мәңгегә башын салган каһарманнарыбыз турында онытмасак иде”

9 декабрь — Ватан Геройлары көне — үзенең батырлыгы, намусы һәм хәрби бурычка тугрылыгы белән илебезне яклаган һәм яклауда дәвам итүчеләрне искә алу һәм хөрмәтләү көне. Бу истәлекле дата уңаеннан Г. Камал театрында Ватан Геройларын – каһарманнарны хөрмәтләделәр. Бары шундый чараларда гына күкрәге орден-медальләр белән тулган хәрби киемдәге ир-егетләрне очратырга буладыр. Гамәлләре белән чын каһарман булуын дәлилләгән кыю затларыбыз сүзгә саран үзләре. Сораштыра башлагач та, оялып кына җавап кайтаралар.

– Үзем Яшел Үзән районында туып-үстем. 2022 елда махсус хәрби операция зонасы башлангач Чечняда оештырылган «Ахмат» батальоны аша контракт төзеп яу кырына китәргә булдым, – ди «Феникс» позывноен алган Виталий Ильин. – Иң кайнар нокталарда хезмәт итәргә туры килде: Угледар, Курсктагы Суджа шәһәре өчен барган бәрелешләрне телгә алу да күп нәрсә турында сөйли. Баштан штурм бригадасында, аннан соң разведкада хезмәт иттем. Каршы як хәтәр корал куллана. Безнең егетләребезнең сынмас-сыгылмас көчле рухлы булуы иң хәлиткеч көрәшләрдә дә алда барырга мөмкинлек бирә. Аларга алга таба уңышлар телим, без алар белән. Яу кырында мәңгегә башын салган каһарманнарыбыз турында онытмасак иде.

Яугир үзенең хезмәттәшләрен, барлык татарстанлыларны да Ватан Геройлары көне белән котлап тыныч аяз күге, җиңү теләде.
– Махсус хәрби операция зонасыннан яраланып, яисә демобилизацияләнеп кайткан егетләрне республика җитәкчелеге онытмый, әнә шундый чаралар үткәрелеп килә. Төрле яра алып, сәламәтлекләрен югалткан егетләр өчен бу бик мөһим, үзләренең кирәкле булуларын тоеп яшәсеннәр, - дигән фикердә ветеран-сугышчы.

Түбән Кама шәһәреннән килгән кунагыбыз Заур Муратов тумышы белән көньяктан булса да, безнең республикабыз өчен җан ата. Мобилизация игълан ителеп, повестка килгәч тә тиз арада юлга кузгала. Үзе генә дә түгел, бертуган энесенә дә килә ул кәгазь.
– Татарстанның 430нче полкында хезмәт иттем. Өч ел махсус хәрби операция зонасында булу дәверендә рядовойдан өлкән лейтенант дәрәҗәсенә кадәр күтәрелдем. Артемовск, Кременная якларында хезмәт иттем. Энем Руслан белән бер ротада булдык, сәламәтлегем белән бәйле проблемалар килеп тугач, мине алга таба хезмәт итү өчен яраксыз дип игълан иттеләр. 28 октябрьдә энемнең яу кырында һәлак булуы турында хәбәр килде. Барысы да Аллаһы Тәгалә кулында, шундый авыр чакта ярдәм иткән һәркемгә рәхмәт. Каһарманнар үлми-алар безнең йөрәкләрдә яши, - диде Заур.

Татарстан Дәүләт Советы рәисе Фәрит Мөхәммәтшин бәйрәм чарасына килгән һәркемне котлап илебез азатлыгы өчен көрәшеп, яу яланнарында ятып калган яугирләрне бер минут тынлык белән искә алырга чакырды.
– Татарстанда бу мактаулы исемлеккә барлыгы 439 Ватан Герое исеме кертелгән. Алар арасында: 353 Советлар Союзы Герое; 51 Дан орденының тулы кавалеры; 35 Россия Герое (шул исәптән 16сы исән). Россиянең 17 Героена әлеге лаеклы исем махсус хәрби операция барышында бирелде, шуларның 8е үлгәннән соң. Ватан өчен, киләчәк буыннарның имин тормышта яшәве өчен гомерләрен корбан иткән фидакарь сугышчыларыбызның якты истәлеге күңелләребездә һәрчак сакланыр. Һәлак булганнарның якты рухын һәрчак искә алыйк, – диде ул.

Егетләребез фронтның алгы сызыгында Ватаныбызны саклап көрәшкәндә, безнең төп бурычыбыз – аларның якыннары, газиз кешеләре өчен күңелләре тыныч булуын тәэмин итү. Һәлак булган сугышчыларның гаиләләре турында кайгырту – тагын да мөһимрәк. Әлеге бәйрәм чарасы да нәкъ шул максатны тотып әзерләнгән.

Автор фотолары