#Җәмгыять 14 октябрь 2025, 14:41

Казанда «Без россиялеләр» яшь патриотлар форумы узачак

14 октябрь 2025, 14:41

Казанда 5-7 ноябрьдә “Халыклар дуслыгы” йортында “Без – россиялеләр” (“Мы – россияне”) иҗтимагый хәрәкәтенең форумы була.

Скопировать ссылку

Казанда «Без россиялеләр» яшь патриотлар форумы узачак

Россия төбәкләреннән 250 делегат килә. Форумның төп темасы – ватанпәрвәрлек тәрбияләү.

“Татар-информ” мәгълүмат агентлыгында үткәрелгән матбугат конференциясендә бу турыда Татарстанның яшьләр эшләре буенча министры урынбасары Айгөл Сабирова белән “Татарстан Республикасы халыкларының яшьләр ассамблеясы” иҗтимагый хәрәкәте рәисе, “Без – россиялеләр” төбәк проекты җитәкчесе Диләрә Дамар хәбәр итте. “Россия халыклары ассамблеясы” белән берлектә “Без – россиялеләр” иҗтимагый хәрәкәте милләтара дуслыкны ныгытуга, Россия халыкларының мәдәниятен саклауга һәм үстерүгә юнәлтелгән эшчәнлек алып бара.

– Татарстанда төрле милләтләр вәкилләре булган яшьләр дә күп, алар арасында үзара дуслык бик мөһим. Быелгы чаралар Россиядә 2025 ел – Ватан сакчысы елы шигарендә оештырыла. Яшьләр белән эшләүдә Россиянең башка төбәкләренең дә уңышлы үрнәкләрен кулланабыз, – диде Айгөл Сабирова.
“Без – россиялеләр” иҗтимагый хәрәкәте Җиңүнең 80 еллыгына багышлап та тематик чаралар үткәргән.

– Ватанга мәхәббәтне яшьтән тәрбияләү зарур. Бу юнәлештәге эшчәнлектә медиа яссылыкны да файдаланабыз, чөнки медиа сәнгать яшьләр күңеленә якын, – диде Диләрә Дамар.

Россия халыклары ассамблеясы советы рәисе урынбасары Андрей Худолеев видеоэлемтә аша ясаган чыгышында Россия Федерациясе Президенты Владимир Путинның халыкларның бердәмлегенә зур әһәмият бирүен искәртте. “Россия халыкларының яшьләр ассамблеясы” иҗтимагый хәрәкәте рәисе Дина Громатикополо “Без – россиялеләр” форумнарында традицион гаилә кыйммәтләренең дә алгы планга куелуын әйтте. “Казандагы форумда яшьләр белән эшләү буенча тәкъдим ителгән яңа үзенчәлекле проектлар Мәскәүдә федераль мәйданга да чыгарылачак”, – диде ул.

Татарстанның Яшьләр эшләре буенча министрлык белән “Татарстан Республикасы халыкларының яшьләр ассамблеясы” иҗтимагый хәрәкәте “Халык иҗаты һәм гамәли-кулланма сәнгать” республика яшьләр фестиваль-конкурсы уздыра. Ул милли киемнәр һәм бизәнү әйберләре ясау белән шөгыльләнүче яшьләргә теләктәшлек максатында, “Яшьләр һәм балалар” илкүләм проекты кысаларында оештырыла. Эшләрнең фоторәсемнәрен социаль челтәрдәге шәхси битеңдә 25 октябрьгә кадәр куярга кирәк. Конкурс турында тулы мәгълүмат белән Яшьләр эшләре буенча министрлык яки республиканың Яшьләр ассамблеясы сайтында танышырга мөмкин.

Кызыклы яңалыкларны күзәтеп бару өчен безнең МАХ каналына кушылыгыз.