Халык талантлары Кукмара районына җыела

22 ноябрь көнне кичке сәгать җидедә Кукмара районының Күкшел авылы сәхнәсен төрле җирләрдә яшәүче талант ияләре гөрләтәчәк. Аларның максаты бер – егетләребезгә матди яктан ярдәм итү. 

– Егетләргә ярдәм оештырырга кирәк, дигән уй күптәннән күңелемдә бар иде, – ди әлеге концертны оештыручыларның берсе Миңнемулла Галиев. – “Кыңгыраулы гармун” концерт группасында хәйрия концерты белән берәр районга барырга дигән фикер яңгыраганнан соң, без дустым Марс Никитин белән киңәшләштек тә, аларны үзебезнең авылга кунакка чакырырга булдык. Дөресрәге, концертны декабрь аенда Актаныш районында оештырмакчылар иде. Аңа кадәр шактый вакыт бар дип,  үзебезгә дә чакырдык. Һәм әлеге гармунчылар янына, районыбыз һәм төрле җирләрдә яшәүче башка иҗатташ дусларыбызны да кунакка дәштек. 

Кукмара районының Күкшел авыл җирлегеннән 12 егет ил сагына киткән. Ни кызганыч, шуныэ икесе вафат (берсенең әнисе шушы авылдан), каберләре Күкшел зиратында. Бер егет яраланып кайткан, әлегә дәваланып йөри. Калган егетләр сугыш кырында, ил азатлыгы өчен көрәштә. Менә шул егетләргә ярдәм итү максаты белән җыр-моң сөючеләр Кукмара ягы халкы белән очрашуга килергә җыена.    

"Кыңгыраулы гармун" төркеме җитәкчесе Рөстәм Фәхриевка бик зур рәхмәт. Ул республиканың барлык гармунчыларын аралаштырып, очраштырып торучы кеше. Концертка да ул үзенең дусларын алып килә. Безгә бу концертны оештырырга да бик нык ярдәм итте", - ди оештыручылар.

Концертка Кукмараның төрле авылларыннан,  Балтач, Саба, Мамадыш кебек күрше районнар гына түгел, ерак араларны якын итеп, Актаныш, Минзәлә, Тукай районнары, Казан, Чаллы шәһәреннән, Киров өлкәсеннән дә гармунчылары, җырчылары киләчәк. “Чувашия, Ульян төбәкләреннән, Буа районыннан да иҗатташ дусларыбыз килмәкче иде, кызганыч, ара ерак, бу юлы алар килә алмый. Концертта катнашучы кешеләрнең барысы да өлкән яшьтәгеләр. Шулай булсак та, егетләр хакына килергә тырышалар. Иң өлкәнебез, моңлы тавышлы гармунчы-җырчыбыз Рафис абый тиздән 80 яшен тутыра”, - ди оештыручы Марс Никитин.  
Менә шулай төрле җирләрдә гомер итүче егет солтаннары, тормыш алиһәләре тормыштагы үз мәшәкатьләрен бер читкә куеп, башкаларга килгән авырлыкларны җиңеп чыгарга ярдәм итү максаты белән Кукмарага җыела. Инде менә ничә тапкыр бергә очрашып, башкаларга рухи азык, авыр хәлдә калучыларга финанс яктан ярдәм итә алар. Концертка Кукмара районы халкын көтеп калалар.    

– Бу башлангычыбыз киләчәктә дә дәвамлы булып, республиканың төрле районнарында мондый чараларда катнашырга насыйп булсын, – диләр Күкшел авылы гармунчылары  Миңнемулла Галиев белән Марс Никитин.